شال نیوز
.jpeg)
نیویارک : پاکستان په ملګرو ملتونو کې له یمني حوثي وسله والو غوښتي چې د باب المندب په تنګي کې پر سوداګریزو بېړیو بریدونه ودروي.
په ملګرو ملتونو کې د پاکستان دایمي استازي عاصم افتخار احمد ،د سپتمبر په ۱۹مه، ویلي دي، چې د سوداګریزو بېړیو پر وړاندې بریدونه کولی شي د سمندري سوداګرۍ پر بهیر، د تېلو پر نړیوالو رسولو او د خوراکي توکو پر بیو منفي اغېز وکړي.
نوموړي ویلي چې د سمندري سوداګرۍ د خوندي تګ راتګ ډاډ د نړیوالې سوداګرۍ لپاره مهم دی. پاکستان یو ځل بیا د سعودي عربستان د ځمکنۍ بشپړتیا او امنیت ملاتړ څرګند کړی او ویلي یې دي چې د سعودي د خاورې پر وړاندې هر ډول ګواښ د منلو وړ نه دی.
باب المندب د سره سمندر او عدن خلیج ترمنځ یوه ستراتیژیکه سمندري لار ده، چې د نړۍ د سوداګرۍ او د انرژۍ د لېږد لپاره ځانګړی اهمیت لري.
.jpeg)
د دې تنګي له لارې هره ورځ ګڼې سوداګریزې او د تېلو لېږدوونکې بېړۍ تېرېږي. د سیمې ناامني او پر بېړیو بریدونه د سمندري ترانسپورټ پر لګښتونو او د نړیوالو اکمالاتي ځنځیرونو پر ثبات اغېز کولی شي.
د حوثیانو له لوري په سره سمندر او شاوخوا سمندري سیمو کې د بېړیو پر وړاندې بریدونو د سیمې د امنیت او نړیوالې سوداګرۍ په اړه اندېښنې زیاتې کړې دي.
.jpeg)
