اسلام‌ اباد : د جماعت اسلامي مشر حافظ نعیم الرحمان ویلي، که وفاقي حکومت د پټرولیم لېوي د ختمولو په اړه مثبت ځواب ورنه کړي، نو د سپټمبر پر ۱۰مه به د حکومت خلاف د لانګ مارچ اعلان وکړي.

حافظ نعیم الرحمان ویلي، د جماعت اسلامي او حکومت ترمنځ به ،د سپتمبر په ۱۰مه، بیا خبرې کېږي او که په دغو خبرو کې د پټرولیم لېوي د ختمولو په اړه پرمختګ ونه شو، نو جماعت اسلامي به د لانګ مارچ بلنه ورکړي.

هغه ویلي، که حکومت پټرولیم لېوي او پر پټرولو لګېدلي ځینې نور ټیکسونه لرې کړي، د پټرولو بیه ۱۰۶ روپۍ فی لیټر کمېدای شي.

د جماعت اسلامي مشر ویلي، پټرولیم لېوي د نړیوال بازار د تېلو له بیو سره مستقیم تړاو نه لري او حکومت دا پیسې د خپلو عوایدو د زیاتولو لپاره اخلي. د هغه په وینا، حکومت په یوه کال کې د پټرولیم لېوي له لارې ۱۵۶۷ اربه روپۍ راټولې کړې دي.

جماعت اسلامي د پټرولیم لېوي د ختمولو لپاره حکومت ته شپږ وړاندیزونه هم سپارلي دي. د پلاننګ وفاقي وزیر احسن اقبال ویلي، دغه وړاندیزونه اړوندو وزارتونو ته استول شوي او که عملي کېدل یې ممکن وي، حکومت به پرې غور وکړي.

پاکستان : حکومت او جماعت اسلامي پر اقتصادي غوښتنو خبرې کوي؛ احتجاجي پرلتونه به روان وي

جماعت اسلامي له تېرو څو اوونیو راهیسې د پټرولیم لېوي، د تېلو د لوړو بیو او ګرانۍ خلاف احتجاجونه کوي او د سپټمبر پر درېیمه یې په ټول هېواد کې د کاربندیز بلنه هم ورکړې وه.

دا خبرداری په داسې وخت کې ورکړل شوی چې وفاقي حکومت د سپټمبر له نهمې د پټرولو بیه ۵ روپۍ او ۵۸ پیسې نوره لوړه کړې او نوی نرخ یې ۳۶۴ روپۍ او ۳۵ پیسې فی لیټر ټاکلی دی.

د حکومت د اعلان له مخې د تېز رفتار ډیزلو بیه هم ۴ روپۍ او ۱۸ پیسې لوړه شوې او ۳۸۵ روپۍ او ۹۵ پیسې فی لیټر ته رسېدلې ده.