کوټه / قلات : د بلوچستان اعلا وزیر ،میر سرفراز بګټي، ویلي دي، چې د قلات ضلعې د شور پارود په غرنیزه سیمه کې به د پوځي عملیاتو له پېل وړاندې شاوخوا زر اوسېدونکي د نامعلومې مودې لپاره له سیمې وایستل شي.

نوموړي د سپتمبر په ۵مه د بلوچستان اسمبلۍ غونډې ته ویلي دي، چې حکومت غواړي د عملیاتو له پېل وړاندې ملکي خلک له احتمالي خطره خوندي کړي او نورو ځایونو ته یې انتقال کړي.

د سرفراز بګټي په وینا، د شور پارود په غرونو کې له ۱۹۷۰مو کلونو راهیسې په بېلابېلو وختونو کې د وسله والو مرکزونه موجود پاتې شوي او امنیتي ځواکونه غواړي په سیمه کې عملیات وکړي.

هغه ویلي دي، چې د حکومتي سروې له مخې په شور پارود کې شاوخوا زر کسان ژوند کوي او د سیمې د پرېښودو لپاره ځینو اوسېدونکو ته نوټسونه هم ورکړل شوي دي.

اعلا وزیر ویلي دي، چې د خلکو انتقال به دایمي نه وي، خو تر اوسه دا نه دي ویل شوي چې دغه کورنۍ به څومره موده له خپلو کورونو بهر پاتې کېږي.

حکومت وايي، چې د انتقال شوو کورنیو لپاره به د اوسېدو او بنیادي اړتیاوو انتظام کوي، خو تر اوسه نه د انتقال کره نېټه اعلان شوې او نه هغه ځایونه په ډاګه شوي چې دغه خلک به ورته وړل کېږي.

دا اعلان په داسې وخت کې شوی دی چې د پاکستان امنیتي ځواکونه په قلات، مستونګ، کوټه، سبي او د بلوچستان په نورو سیمو کې د وسله والو پر ضد پرله‌ پسې استخباراتي او هدفي عملیات کوي.

د پاکستان پوځ د سپټمبر پر ۴مه ویلي وو چې په بلوچستان کې یې په څو عملیاتو کې لسګونه وسله وال وژلي دي. پوځ دغه عملیات د «عزمِ استحکام» د پراخې ترهګرۍ ضد تګلارې برخه بللې ده.

تر دې وړاندې په بلوچستان کې ځینې عملیات د «ردالفتنه» تر نوم لاندې هم ترسره شوي، خو د شور پارود لپاره د راتلونکو عملیاتو کوم ځانګړی رسمي نوم تر اوسه نه دی اعلان شوی.

شور پارود د امنیتي عملیاتو لپاره نوې سیمه نه ده. په تېرو میاشتو کې هم په دغه غرنیزه سیمه او شاوخوا ځایونو کې د امنیتي ځواکونو د عملیاتو راپورونه ورکړل شوي دي. خو اوسنی پرمختګ ځکه مهم بلل کېږي چې حکومت د عملیاتو له پېل وړاندې د شاوخوا زر ملکي اوسېدونکو د منظم ایستلو پلان اعلان کړی دی.

په پاکستان کې د لویو پوځي عملیاتو له وړاندې د خلکو د ایستلو تجربه تر دې مخکې په سوات، وزیرستان او نورو قبایلي سیمو کې هم لیدل شوې ده. خو تر اوسه حکومت یا پوځ نه دي ویلي چې په بلوچستان کې به هم د قبایلي سیمو په څېر یو واحد، پراخ او اوږدمهاله پوځي عملیات پېل شي.

د شور پارود د ځايي اوسېدونکو یا قبایلي مشرانو جلا دریځ تر اوسه په خپرو شوو رسمي راپورونو کې نه دی شامل شوی.

اوس مهمې پوښتنې دا دي چې عملیات به کله پېل شي، خلک به کومو ځایونو ته انتقالېږي او د نامعلومې مودې لپاره له خپلو کورونو بهر پاتې کېدونکي کسان به څه ډول سهولتونه ترلاسه کوي.