شال نیوز
.jpeg)
نارووال : د پنجاب په نارووال ضلعه کې د هندوانو یو تر سل کاله ډېر زوړ مندر نړېدلی او د لږکیو د حقونو یوې ډلې ویلي دي چې مندر د نږدې اسلامي مدرسې د پراخولو لپاره نړول شوی دی.
د متروکه وقف املاک بورډ دا خبره رد کړې ده او ویلي یې دي چې مندر د سختو بارانونو له امله نړېدلی دی. پېښه د اګست پر ۲۱مه د نارووال په سراج کلي کې شوې ده.
د پاکستان مسیحا ملت پارټۍ مشر اسلم پروېز سهوترا ویلي دي، چې د مندر له نړېدو وروسته د ودانۍ خښتې، د ګنبذ سامان او نور توکي هم له ځایه وړل شوي دي.
هغه ویلي دي، چې د اګست پر ۲۸مه یې له یوشمېر ځايي کسانو سره د پنجاب له اېډیشنل داخله سېکرټر سره کتلي او د پېښې د پلټنې غوښتنه یې کړې ده.
سهوترا ویلي دي، چې د مندر ترڅنګ ځمکه پخوا یوې اسلامي مدرسې ته په اجاره ورکړل شوې وه، خو وروسته دغه اجاره ختمه شوې وه. د هغه په وینا، اجاره ځکه ختمه شوې وه چې کرایه نه وه ورکړل شوې او ځمکه هم د هغه مقصد لپاره نه استعمالېده چې په اجاره ورکړل شوې وه.
نوموړي ویلي دي، چې د متروکه وقف املاک بورډ د سیالکوټ مرستیال منتظم د روان کال د جنورۍ پر ۲۹مه د مدرسې اجاره ختمه کړې وه او د ملکیت له ځینو برخو څخه یې د قبضه کوونکو د ایستلو امر هم کړی و.
د لږکیو د حقونو ډله وايي، چې د مندر نړېدل د همدې ځمکې له شخړې سره تړاو لري او غواړي چې د مندر ځای د نږدې اسلامي مدرسې د پراخولو لپاره استعمال شي.
1.jpeg)
خو د متروکه وقف املاک بورډ چارواکي افتخار رانا ویلي دي، چې مندر چا نه دی نړولی او د سختو بارانونو له امله نړېدلی دی. د هغه په وینا، د ادارې په ریکارډ کې د مندر کوم ځانګړی نوم نه دی ثبت شوی، خو ودانۍ له ۱۰۰ څخه تر ۱۲۵ کلونو پورې پخوانۍ وه.
رانا ویلي دي، چې د مندر ترڅنګ ځمکه یوې اسلامي مدرسې ته په اجاره ورکړل شوې وه، خو د مندر خپله ځمکه په دغه اجاره کې شامله نه وه. نوموړي ویلي دي، چې د متروکه وقف املاک بورډ به د مندر د بیا جوړولو په اړه پرېکړه کوي.
د لږکیو د حقونو ډلې له پنجاب حکومت څخه غوښتنه کړې ده چې د پېښې پلټنه وکړي، که څوک د مندر په نړولو کې لاس ولري پر ضد یې قانوني اقدام وشي او مندر بېرته جوړ کړل شي.
تر اوسه د مندر د نړېدو په اړه داسې خپلواکه پلټنه نه ده خپره شوې چې وښيي ودانۍ د سختو بارانونو له امله نړېدلې او که د نږدې اسلامي مدرسې د پراخولو لپاره نړول شوې ده.
.jpeg)
.jpeg)
.jpeg)
