شال نیوز
کابل : د طالبانو یو لوړپوړی چارواکی شهاب الدین دلاور وايي، چې له شپږم ټولګي پورته د نجونو د زده کړو د ځنډولو پرېکړه د طالبانو مشر هبت الله اخندزاده کړې ده او ،د هغه په وینا، د دې امر په مقابل کې د طالبانو چارواکي او عام خلک څه نه شي ویلی.
د افغانستان د تېر جمهوري نظام پر مهال په قطر کې د طالبانو د مرکچي پلاوي غړي او اوس د افغاني سرې میاشتې ټولنې مشر شهاب الدین دلاور دا څرګندونې ،د سپتمیر په لومړۍ، له طلوع نیوز سره په یوې ځانګړې مرکه کې کړې دي.
دلاور د نجونو د زده کړو په اړه د پوښتنې په ځواب کې ویلي دي، چې نه غواړي پر دې موضوع اوږد بحث وکړي او دا یې «کلتوري او اسلامي بحث» بللی دی.
هغه ویلي:
«موږ امیر لرو، هغه عالم دی او تر امر ثاني یې امر کړی. په مقابل کې یې نه زه، نه تاسو او نه ملت څه ویلی شي.»
دلاور د طالبانو د مشر د پرېکړې د منلو پر اړتیا ټینګار کړی دی او ویلي یې دي چې د هغه په باور هبت الله اخندزاده د افغانستان له حالاتو، خلکو او کلتور څخه تر نورو ښه خبر دی.
نوموړي د خپل دریځ د تشریح پر مهال د پخوانیو سیمه ییزو واکمنو مثالونه هم ورکړي او ویلي یې دي، چې که هر چارواکی د مرکزي مشر د امر په وړاندې خپل دریځ غوره کړي، په هېواد کې به ګډوډي رامنځته شي. دلاور ویلي دي، چې د نجونو د زده کړو په اړه د طالبانو په رسمي امر کې د «بندیز» پر ځای د «تر امر ثاني» اصطلاح کارول شوې ده.
هغه زیاته کړې:
«امیر د تعلیم په اړه د امر ثاني خبره کړې ده. هغه په خپله حالاتو ته ګوري، د افغانستان کلتور ته ګوري او خلکو ته ګوري. بندوالی نه دی راغلی، تر امر ثاني دی.»
د طالبانو چارواکو له دې وړاندې هم په وار وار ویلي دي چې د نجونو زده کړې «تر امر ثاني» ځنډول شوې دي. دلاور په تازه مرکه کې دا دعوه هم کړې ده چې امریکا او یو شمېر نور هېوادونه د نجونو د زده کړو موضوع د طالبانو پر حکومت د فشار لپاره کاروي.
طالبانو د ۲۰۲۲م کال په مارچ کې له شپږم ټولګي پورته نجونو ته اجازه ورنهکړه چې منځنیو او لېسو ته ستنې شي. وروسته د همدې کال په دسمبر کې ښځې او نجونې پوهنتونونو ته له تلو هم منع شوې.
.jpeg)
له هغې راهیسې څو کاله تېر شوي، خو طالبانو نه ده څرګنده کړې چې «امر ثاني» به کله صادرېږي. ملګرو ملتونو او د بشري حقونو ادارو په وار وار له طالبانو غوښتي دي چې د نجونو او ښځو پر زده کړو محدودیتونه ختم کړي.
افغانستان اوس د نړۍ یوازینی هېواد دی چې نجونې پکې له منځنیو زده کړو پورته په رسمي تعلیمي نظام کې د زده کړو اجازه نه لري.
.jpeg)
.jpeg)
