کټمنډو : د نیپال او د چین د تبت ترمنځ په سرحدي سیمه کې د سختو سېلابونو له امله لږ تر لږه ۹۸ کسان مړه شوي او سلګونه نور لا ورک دي. د چهارشنبې، اګست ۲۶مې، د تازه معلوماتو له مخې، نیپالي چارواکو د ۹۵ کسانو د مړینې خبر ورکړی دی، په داسې حال کې چې چین په تبت کې د درې نورو کسانو مړینه تایید کړې ده.

د نیپال د سیاحت چارواکي وايي، چې په ورکو کسانو کي سلګونه بهرني سیلانیان او زیارت کوونکي هم شامل دي. د امریکا، هند، بریتانیا، اسټرالیا، کاناډا او یو شمېر نورو هېوادونو وګړي هم لا نه دي موندل شوي.

سېلاب د نیپال په رسووا او نوواکوت سیمو کې کورونه، سړکونه، پلونه او د برېښنا پروژې ویجاړې کړې دي. په تبت کې هم د ګیرونګ سرحدي بندر ته سخت زیان رسېدلی دی او په ځینو سیمو کې سړکونه، مخابرات او برېښنا پرې شوې ده.

لومړنۍ ارزونې ښيي چې د غرونو د ډبرو او خټو لویه برخه سیند ته لوېدلې او د اوبو ناڅاپي زور یې پراخ سېلاب رامنځته کړی دی. چارواکي د نورو سېلابونو له خطره هم خبرداری ورکوي.

د نیپال او چین د ژغورنې ډلې په سیمه کې د ورکو کسانو لټون کوي، خو خراب موسم، لوړې اوبه او د لارو ویجاړېدل د ژغورنې عملیات له ستونزو سره مخ کړي دي.