کوټه : د عید میلاد النبي ﷺ په مناسبت نن، د اګست پر ۲۶مه، په بلوچستان کې په بېلابېلو ښارونو او ضلعو کې مذهبي جلوسونه، ریلیانې او غونډې کېږي، او صوبايي حکومت د امنیت لپاره ځانګړي تدابیر نیولي دي.

د بلوچستان د اعلا وزیر ،میر سرفراز بګټي، او د کورنیو چارو وزیر ،میر ضیاءالله لانګو، په لارښوونه د جلوسونو پر لارو، مهمو سړکونو، چوکونو او د مذهبي غونډو شاوخوا پولیس، لیویز او نور امنیتي اهلکار پر دندو ګمارل شوي دي.

د بلوچستان د کورنیو چارو د وزارت معاون بابر یوسفزي ویلي دي، چې د جلوسونو منتظمینو ته اړینې اسانتیاوې برابرې شوې دي او د امن او امان د ساتلو لپاره پولیس، لیویز، ضلعي انتظامیه او نورې ادارې په ګډه کار کوي. هغه ویلي دي، چې د جلوسونو د تګ راتګ لارې، د خلکو ګڼه ګوڼه او حساس ځایونه تر ځانګړې څارنې لاندې دي.

په سبۍ کې د ښار له بېلابېلو سیمو څخه له ۳۰ څخه زیات واړه او لوي جلوسونه راوتلي، چې په نشتر روډ کې له مرکزي جلوس سره یوځای کېږي. د جلوسونو پر لارو امنیتي اهلکار ځای پر ځای شوي دي، او میونسپل کمیټۍ د صفایۍ او د چونې شیندلو لپاره هم ځانګړي انتظامونه کړي دي.

په قلات کې هم د ښار له بېلابېلو سیمو څخه له ۳۰ څخه زیات واړه او لوي جلوسونه راوتلي دي، چې په شاهي بازار کې له مرکزي جلوس سره یوځای کېږي. په قادري چوک کې د مرکزي مذهبي غونډې انتظام شوی دی، چې ګډونوال پکې مذهبي نعرې وهي.

په اوتل کې د سید کبیر شاه له درګاه څخه د عید میلاد النبي ﷺ ریلي راوتلې ده، چې ګڼو خلکو پکې برخه اخیستې ده. ریلي د ملي لویې لارې له بېلابېلو برخو تېره شوې او ګډونوالو مذهبي بیرغونه او بینرونه له ځان سره لېږدولي دي.

کرمه : په بګن کې د میلادالنبي ﷺ دستوره، دینی عالمانو د امن او ورورولۍ پیغام ورکړ

په اوسته محمد کې هم له میلاد چوک څخه یوه لویه ریلي راوتلې ده، چې د ښار له بېلابېلو لارو تېرېږي. د ریلي پر لارو د امنیت لپاره پولیس او نور اهلکار ځای پر ځای شوي دي.

د بلوچستان یو شمېر دیني عالمانو د عید میلاد النبي ﷺ لپاره د صوبايي حکومت امنیتي او انتظامي تیاري وستایه او د امن او امان د ساتلو لپاره یې له انتظامیې سره د همکارۍ ډاډ ورکړی دی. صوبايي چارواکي وايي، چې هڅه دا ده چې د عید میلاد النبي ﷺ مذهبي پروګرامونه، جلوسونه او غونډې په سوله‌ ییز او منظم ډول ترسره شي.