اسلام‌ اباد : په اسلام‌ اباد کې د افغانستان سفارت د طالبانو د بیا واکمنېدو د پنځمې کلیزې په مناسبت یوه لویه دستوره کړې چې پکې د بېلابېلو هېوادونو ډیپلوماتانو، د پاکستان دیني او سیاسي مشرانو، علماوو، ټولنیزو شخصیتونو او افغان استازو ګډون کړی دی.

د جمعیت علمای اسلام مشر ،مولانا فضل الرحمان، هم له یو پلاوي سره د افغانستان سفارت ته ورغی او په دستوره کې یې ګډون وکړ. د غونډې په خپرو شوو انځورونو کې مولانا فضل الرحمان د افغان استازو او نورو ګډونوالو تر څنګ لیدل کېږي.

د افغانستان سفیر ،سردار احمد شکیب، څو ورځې وړاندې له مولانا فضل الرحمان سره لیدلي وو او هغه ته یې د سفارت په دې دستوره کې د ګډون رسمي بلنه ورکړې وه. په هغه ملاقات کې د پاکستان او افغانستان د اړیکو، سیمه‌ ییز امنیت او د دواړو هېوادونو ترمنځ د روان تاوتریخوالي د کمولو په اړه هم خبرې شوې وې.

د طالبانو حکومت د اګست ۱۵مه افغانستان ته د خپل بیا راتګ او واکمنېدو د کلیزې په توګه نمانځي. طالبان د ۲۰۲۱م کال د اګست پر ۱۵مه کابل ته ننوتل او د اشرف غني په مشرۍ پخوانی جمهوري حکومت ړنګ شو. د ۲۰۲۶م کال د اګست پر ۱۵مه د طالبانو د بیا واکمنېدو پنځه کاله پوره شول.

طالب چارواکو د پنځمې کلیزې په مناسبت په کابل او د افغانستان په نورو سیمو کې هم دستورې کړې دي. د طالبانو د بهرنیو چارو وزارت ویلي دي چې په پاکستان او یو شمېر نورو هېوادونو کې د افغانستان ډیپلوماتیکې استازولۍ هم د کلیزې په مناسبت پروګرامونه کوي.

د اسلام‌ اباد په دستوره کې د بېلابېلو هېوادونو د سفارتونو او ډیپلوماتیکو ادارو استازو هم ګډون کړی دی. د خپرو شوو انځورونو له مخې د پاکستان د دیني او سیاسي حلقو د استازو حضور هم د پام وړ و، خو د ټولو بهرنیو ډیپلوماتانو او پاکستاني شخصیتونو بشپړ رسمي نوملړ تر اوسه په عامه توګه نه دی خپور شوی.

مولانا فضل الرحمان له افغان طالبانو سره اوږدې سیاسي اړیکې لري او په وروستیو کلونو کې یې څو ځله د پاکستان او افغانستان ترمنځ د تاوتریخوالي د کمولو او خبرو ملاتړ کړی دی. نوموړي د ۲۰۲۴م کال په جنورۍ کې کابل ته هم د یو پلاوي مشري کړې وه او هلته یې د طالبانو له اعلا چارواکو سره د دواړو هېوادونو پر اړیکو خبرې کړې وې.

د اسلام‌ اباد دا دستوره په داسې وخت کې شوې ده چې د پاکستان او افغانستان اړیکې له جدي امنیتي اختلافونو سره مخ دي. پاکستان تور لګوي چې د تحریک طالبان پاکستان وسله‌ وال په افغانستان کې پټنځایونه لري او له هغه ځایه په پاکستان کې بریدونه تنظیموي، خو د طالبانو حکومت دا تورونه ردوي او وايي، د افغانستان خاوره به د بل هېواد پر ضد استعمالېدو ته پرېنږدي.

د مولانا فضل الرحمان او د هغه د پلاوي ګډون له همدې امله سیاسي اهمیت هم لري، ځکه هغه د پاکستان له هغو مهمو دیني او سیاسي مشرانو څخه دی چې له افغان طالبانو سره یې مستقیم تماسونه ساتلي او د کابل او اسلام‌ اباد ترمنځ د اړیکو په اړه یې په وار وار خپل دریځ څرګند کړی دی.

طالبانو د پنځه کلن واک د کلیزې په مناسبت خپل حکومت د افغانستان د امنیت او خپلواکۍ د ټینګښت دوره بللې، خو نړیوالې ادارې او د بشري حقونو سازمانونه د ښځو او نجونو پر زده کړو، کار او ټولنیز ژوند د محدودیتونو، بشري بحران او د نړیوال رسمیت د نشتوالي په اړه اندېښنې څرګندوي. د طالبانو حکومت وايي، د ښځو حقونه د دوي د اسلامي نظام او شریعت له اصولو سره سم خوندي دي.

پنځه کاله وروسته هم د طالبانو حکومت محدود نړیوال رسمیت لري. روسیه تر اوسه یوازینی هېواد دی چې د طالبانو حکومت یې په رسمي ډول په رسمیت پېژندلی، خو د چین، پاکستان، ایران، ترکیې او یو شمېر نورو هېوادونو له حکومتونو سره د طالبانو ډیپلوماتیکې اړیکې او رسمي تماسونه روان دي.

په اسلام‌ اباد کې د افغانستان سفارت د طالبانو د ټاکل شوو ډیپلوماتانو تر ادارې لاندې کار کوي او سردار احمد شکیب په پاکستان کې د افغان ډیپلوماتیک ماموریت مشري کوي.

په دستوره کې د بهرنیو ډیپلوماتانو، پاکستاني دیني او سیاسي مشرانو او علماوو ګډون ښيي چې طالبان هڅه کوي په پاکستان کې له سیاسي، دیني او ډیپلوماتیکو حلقو سره خپلې اړیکې پراخې او فعالې وساتي، په ځانګړي ډول په داسې وخت کې چې د کابل او اسلام‌ اباد رسمي اړیکې له امنیتي اختلافونو سره مخ دي.