ختیځ انډونیزیا : د انډونیزیا په ختیځ کې د فلورېس ټاپو ته نږدې د ۷ اعشاریه ۷ درجې زورورې زلزلې له امله لږ تر لږه ۴۷ کسان وژل شوي، لسګونه نور ژوبل دي او شاوخوا دوه زره کسان د خپلو کورونو پرېښودو ته اړ شوي دي.

اسوشیټېډ پرېس د انډونیزیا د چارواکو له قوله وايي، زلزله ،د اګست په ۱۴مه، د فلورېس سیمې د ساحل په شمال کې شوې او مرکز یې د ختیځ نوسا ټینګارا صوبې د اېنډې ښار شمال ـ لوېدیځ ته شاوخوا ۶۸ کیلومتره لرې و. د امریکا د جیولوجیکل سروې له مخې، د زلزلې ژوروالی شاوخوا لس کیلومتره و.

له اصلي زلزلې وروسته لږ تر لږه ۲۳۵ نورې کمزورې زلزلې ثبت شوې دي. د پرله‌ پسې ټکانونو له وېرې ګڼ خلک لا هم خلاصو ځایونو او موقتي پناه‌ ځایونو کې پاتې دي.

زلزلې په ځینو سیمو کې د ځمکې ښوېدنې هم رامنځته کړې دي او ځینې لویې لارې یې بندې کړې دي. د ترانس فلورېس لویې لارې په ګډون د یو شمېر سړکونو بندېدو د ژغورنې د ډلو کار ستونزمن کړی او چارواکي وايي، چې ځینو لېرې کلیو ته لا هم په بشپړ ډول نه دي رسېدلي.

په تر ټولو زیانمنو سیمو کې کورونه نړېدلي، برېښنا پرې شوې او مخابراتي اړیکې هم اغېزمنې شوې دي. اسوشیټېډ پرېس وايي، چې لږ تر لږه ۱۵۷ کورونه په بشپړ ډول نړېدلي او نږدې ۲۰۰ نور کورونه زیانمن شوي دي. له سلو زیات ښوونځي، روغتیايي مرکزونه، عبادتځایونه او نور عامه تاسیسات هم زیانمن شوي دي.

په سیکا سیمه کې د ماؤمېرې ښار له هغو ځایونو څخه دی چې درنه مرګ‌ ژوبله پکې شوې ده. د زلزلې له امله په بېلابېلو ودانیو کې خلک تر کنډوالو لاندې بند پاتې شوي او ژغورونکي د هغوي د را ایستلو هڅې کوي. رویټرز وايي، چې د خرابو لارو، ځمکې ښوېدنو او مخابراتي ستونزو له امله د زیانونو بشپړ انځور لا نه دی روښانه شوی.

له زلزلې وروسته چارواکو د سونامي خبرداری هم ورکړی و. دا خبرداری شاوخوا درې ساعته وروسته ختم شو. په ساحلي سیمو کې د وړې سونامۍ څپې ثبت شوې؛ اسوشیټېډ پرېس د ریونګ په سیمه کې د تر ټولو لوړې څپې اندازه شاوخوا ۱ اعشاریه ۶۱ متره ښيي.

شاوخوا دوه زره کسان له خطرناکو سیمو ایستل شوي او موقتي مرکزونو ته انتقال شوي دي. روغتیايي ډلې هم په ځینو سیمو کې د ودانیو د زیان له امله له روغتونونو بهر ناروغانو ته طبي خدمات ورکوي.

د انډونیزیا د ناورینونو د مدیریت ادارې ویلي دي، چې د ژغورنې، د ټپیانو د درملنې او د زیانونو د ارزونې عملیات دوام لري. چارواکي اندېښنه لري چې ځینو لېرې او غرنیو سیمو ته د ژغورونکو له رسېدو وروسته به د مرګ‌ ژوبلې شمېر نور هم لوړ شي.

انډونیزیا د ارام سمندر د زلزلو په فعاله سیمه، چې د «اور کړۍ» په نوم پېژندل کېږي، پرته ده او وخت ناوخت له زورورو زلزلو، اورغورځونکو غرونو او سونامي سره مخ کېږي.