د تحصیل خار پولیسو چارواکي، عبد العزیز، رسنیو ته ویلي، چې د عنایت کلي په بازار کې ،اپرېل په ۲۶مه، د  ناڅرګنده وسله‌والو په ډزو یو مخور قامي مشر، ملک فضل واحد، وژل شوی دی.

د ځایي سرچینو په وینا، وسله‌والو کسانو پر ملک فضل واحد ناڅاپي ډزې وکړې چې له امله یې هغه پر ځای ساه ورکړه. بریدګر د پېښې وروسته له سیمي تښتېدلي دي.

د پولیسو په وینا، وژل شوی مشر د تحصیل ماموند د ډمه ډوله ملکان سیمي اوسېدونکی و. هغوي زیاته کړه چې د پېښې د څرنګوالي د معلومولو او د بریدګرو د نیولو لپاره پلټنې روانې دي.

د سیمي خلک وایي چې دا پېښه د اندېښنې وړ ده، ځکه چې ملک فضل واحد د یوه پېژندل شوي قامي شخصیت په توګه یادېده. د یادونې وړ ده چې له دې وړاندې، په ۲۰۱۰ کال کې د هغه مشر ورور ملک عبد الحمید هم د پاکستاني طالبانو له خوا وژل شوی و، ځکه چې هغه د طالبانو د فعالیتونو مخالف و.

تر اوسه پورې د دې وروستي برید مسؤلیت چا پر غاړه نه دی اخیستی.