د افغانستان پخواني ولسمشر ،حامد کرزي، ویلي دي، چې په هېواد کې د ماشومانو د خوارځواکۍ د مخنیوي لپاره باید ټولو نجونو او هلکانو ته د عمومي زده‌ کړو زمینه برابره شي.

کرزي ،د جولایۍ په ۱۵مه، پر خپلې اېکس‌ پاڼې د ملګرو ملتونو د ماشومانو ملاتړ صندوق (یونېسف) وروستي راپور ته په اشارې وویل، چې په افغانستان کې شاوخوا ۳.۷ میلیونه تر پنځو کلونو کم عمره ماشومان د خوارځواکۍ له جدي ګواښ سره مخ دي.

 



هغه د ماشومانو روغتیا د هېواد د راتلونکي او بشري پانګې بنسټ وباله او له کورنیو او نړیوالو مرستندویه بنسټونو یې وغوښتل چې د دې ګواښ د مخنیوي او د ماشومانو د روغتیا د خوندي کولو لپاره جدي او هر اړخیز اقدامات وکړي.

د افغانستان پخواني ولسمشر ټینګار وکړ چې د ماشومانو د خوارځواکۍ د کمولو لپاره زده‌ کړې مهم رول لري او باید د نجونو او هلکانو پر وړاندې د عمومي زده‌ کړو دروازې پرانېستې وي.

کرزي ویلي، د عامه پوهاوي په زیاتېدو او د مسلکي بشري ځواک په روزنې سره به د بې‌ سوادۍ له امله رامنځته شوې ستونزې کمې شي، اقتصادي وضعیت به ښه شي او هېواد به په تدریجي ډول وکولی شي خپلې اړتیاوې له بهرنیو مرستو پرته هم پوره کړي.