شال نیوز
د چک جمهوریت د زلین ښار د باټا کمپنۍ یوې تاریخي ودانۍ ته، چې اوس د بوټانو د ګودام په توګه کارېږي، د جولایۍ په ۹مه، لوي اور لګېدلی دی.
د چارواکو په وینا، په دې ګودام کې شاوخوا ۷۰ زره جوړې بوټان اېښودل شوي وو، چې د اور له امله ډېری یې سوځېدلي دي. د اور لمبې دومره زورورې وې چې د ودانۍ یوه برخه هم نړېدلې او په سیمه کې د لوګي غټې وریځې خپرې شوې دي.
د اور د مهارولو لپاره سلګونه اوروژونکي، لسګونه د اور وژنې ګاډي او نور ځانګړي وسایل کارول شوي دي. د احتیاطي تدابیرو په توګه خلکو ته سپارښتنه شوې چې د لوګي له امله خپلې کړکۍ او دروازې بندې وساتي.
چارواکي وایي، په دې پېښه کې هېڅوک نه دي وژل شوي او نه هم څوک ټپیان شوي دي. د اور لګېدو لامل تر اوسه نه دی معلوم او د پېښې په اړه پلټنې روانې دي.
د باټا شرکت د نړۍ له مشهورو بوټانو جوړوونکو شرکتونو څخه دی او د زلین ښار د دغه شرکت تاریخي مرکز ګڼل کېږي. یاده ودانۍ، چې د باټا د صنعتي میراث برخه ده، په وروستیو کلونو کې د بوټانو د ګودام په توګه کارول کېده.
