د بلوچستان د خضدار ضلعې په وډھ سیمه کې د جالاوان عوامي پینل د مشر ،میر شفیق مېنګل، پر استوګنځي د ناڅرګنده وسله والو له لوري برید شوی، چې له امله یې په سیمه کې پراخه وېره خپره شوې ده.

ځايي سرچینې وايي، پېښه ،د جولایۍ د ۷مې او ۸مې، ترمنځ د شپې ناوخته هغه مهال رامنځته شوه چې بریدګرو لومړی د کور شاوخوا چاودنې وکړې او وروسته یې په درنو وسلو ډزې پېل کړې. د چاودنو او پرله ‌پسې ډزو غږونه تر لرې سیمو پورې اورېدل شوي دي.

د پېښې وروسته، د سیمي اوسېدونکي په خپلو کورونو کې پاتې شوي او د وضعیت له امله اندېښمن دي. عیني شاهدان وايي چې ډزې څو دقیقې روانې وې، چې ورسره د خلکو ترمنځ وېره نوره هم زیاته شوه.

امنیتي ځواکونه او د قانون پلي کوونکي ادارې سمدستي د پېښې ځای ته رسېدلي، سیمه یې کلابنده کړې او د لټون عملیات یې پېل کړي دي. چارواکي وايي چې د بریدګرو د نیولو لپاره هڅې روانې دي.

تر دې دمه د احتمالي مرګ‌ ژوبلې په اړه کره معلومات نه دي ورکړل شوي، او نه هم کومې ډلې د برید مسؤلیت منلی دی.

خضدار، په ځانګړي ډول د وډھ سیمه، له دې وړاندې هم د قبایلي او سیاسي شخړو له امله د ورته پېښو شاهده پاتې شوې، چې له امله یې د امنیتي وضعیت په اړه اندېښنې زیاتې شوې دي.

چارواکي وايي، د پېښې په اړه پلټنې روانې دي او تمه ده چې نور جزیات به له رسنیو سره شریک شي.