د خیبر پښتونخوا په هنګو ضلعه کې د پولیو ضد کمپاین کې په امنیتي مامورینو وسله وال برید شوی، چې په پایله کې یې یو پولیس سرتېری وژل شوی او څلور نور ټپیان دي۔.

د برید جزیات او ځاني زیان

دا پېښه نن د دوشنبې په ورځ د هنګو د ټل تاڼې په حدودو "چپري وزیران" سیمه کې هغه مهال رامنځته شوه، چې نامعلومو وسله والو د پولیسو پر یو ګاډي ناتاره ډزې وکړې. د هنګو ایس ډي پي او مجاهد حسین په وینا، په دغه برید کې ۵ پولیس سرتېري سخت ژوبل شوي وو چې روغتون ته له لېږدول کېدو وروسته یو تن د ژورو ټپونو له امله ساه ورکړه.

تر دې دمه د دغه برید مسؤلیت کومې وسله والې ډلې پر غاړه نه دی اخیستی، خو پولیسو سیمه کې د بریدګرو د نیولو لپاره پراخ عملیات پیل کړي دي۔.

د اعلی وزیر غبرګون او غندنه

د خیبر پښتونخوا اعلی وزیر سهېل اپریدي پر پولیسو شوی برید په کلکو ټکو غندلی او د وژل شوي سرتېري کورنۍ سره یې خپله خواخوږي شریکه کړې ده.

نوموړي وویل چې د روغتیايي کارکوونکو او امنیتي ځواکونو په نښه کول د هېواد د روښانه راتلونکي پر وړاندې دښمني ده، خو دا ډول بریدونه د پولیو د مخنیوي لپاره د حکومت او ولس ملي هوډ نه شي کمزوری کولی۔

بل خوا د هنګو پوليس د ټولنيز رسينو شبکې، فيسبک، په پاڼه د کوهاټ ډي آئي جي عرفان طارق د خولې ليکلي، چې پوليس په ځوابي کارروايۍ کې دوه وسله وال هم وژلي دي۔ 

د پولیو کمپاین ملي هدفونه

دا برید په داسې حال کې شوی چې نن په ټول هېواد کې د پولیو ضد نوی څلور ورځنی کمپاین پېل شو، چې پکې شاوخوا ۴۵ میلیونه ماشومانو ته د څاڅکو ورکولو هدف ټاکل شوی دی.

په خیبر پښتونخوا کې د پولیو د مخنیوي چارواکي وايي چې یوازې په دغه صوبه کې ۵۰ زره امنیتي سرتېري د ۶.۵ میلیونه ماشومانو د واکسینولو د بهیر د خوندیتوب لپاره ګمارل شوي دي. د چارواکو په خبره په پېښور او خیبر کې به دا کمپاین د نورو سیمو په پرتله تر اوو ورځو پورې دوام ولري.