ظفر وزير
د کوز سویلي وزيرستان د واڼا ښار تاڼې په حدودو کې د کريکوټ په سيمه کې د توجې خېل قبيلې پر مشر ملک جميل د وسلوالو لخوا د بريد راپورونه ترلاسه شوي دي.
د ځايي او حکومتي سرچينو په وينا، ملک جميل د بريد پر مهال ځوابي ډزې کړې دي، چې له امله يې بريد کوونکي له سيمي په شا شوي دي. سرچيني وايي چې د پېښې پر مهال د وسلوالو يو موټرسايکل او ځيني وسلې هم په ځای پاتې شوې دي.
د راپورونو له مخې، له بريد وروسته د دواړو خواوو ترمنځ د ډزو تبادله شوې او په سيمه کې د وقفې وقفې سره د ډزو غږونه اورېدل شوي دي، او کواډکاپټرې هم په فضا کې ګرځي. تر دې دمه د کومې مرګ ژوبلې رسمي راپور نه دی ورکړل شوی.
حکومتي سرچيني وايي چې د پېښې پلټنې روانې دي او د امنيتي وضعيت د کنټرول لپاره اړوندې ادارې هڅې کوي.
ځايي سرچيني زياتوي چې د توجې خېل قبیلي خلکو د چیغي په شکل کې د ملک جميل ملاتړ کړی او د پېښې وروسته د سيمي ګڼ اوسېدونکي د هغه په ملاتړ راټول شوي دي.
د خبر تر ليکلو پورې په کريکوټ او شاوخوا سيمو کې تاوتريخوالی او اندېښنه پر خپل ځای پاتې ده، خو چارواکو د وضعيت د څارنې او د نورو جزئياتو د راټولولو خبره کړې ده.
.jpeg)
