سید اصف شاه کاکاخیل
د چاپېریال نړيوالې ورځې په مناسبت په چترال کې د زده کوونکو او ښوونکو لپاره د چاپېريال ساتنې په اړه يوه پوهاوي غونډه جوړه شوه، چې پکې د چاپېريالي ککړتيا لاملونو، د اقليمي بدلون اغېزو او د چاپېريال د خونديتوب په برخه کې د خلکو پر رول خبرې وشوې.
دغه غونډه ،د جون په ۵مه، د ‘نېشنل انټېګريټېډ ډېوېلپمنټ اېسوسي اېشن’ (ندا پاکستان) له خوا د ،پي پي اېف، په مالي مرسته د چترال د سرکاري سېنټينل هایي سکول په تالار کې جوړه شوې وه.
د غونډې ځانګړی مېلمه د کوز چترال د تعليم ضلعي افسر شاهد حسين و. په دې موقع د ياد سکول پرنسپل عبدالباري، د ندا پاکستان پروژې مشر انوار بيګ، د اغا خان فاونډېشن مشر استاد عبدالولي، د اغا خان رورل سپورټ پروګرام پروژې مشر اسدالله، مولانا محمد قاسم او نورو کسانو ګډونوالو ته ويناوې وکړې.
ويناوالو وويل چې چترال د اقليمي بدلون له جدي اغېزو سره مخ دی او د سېلابونو، وچکالۍ، د واورې د ويلي کېدو او نورو طبيعي بدلونونو له امله سيمه له ګڼو ننګونو سره مخ شوې ده. هغوي ټينګار وکړ چې د دغو ستونزو د مخنيوي لپاره اغېزمنې تګلارې، عامه پوهاوی او د چاپېريال ساتنې په برخه کې ګډې هلې ځلې اهمې دي.
دوي وويل چې د تعليم محکمه بايد د درسي فعاليتونو تر څنګ د چاپېريال ساتنې زده کړو ته هم ځانګړې پاملرنه وکړي او زده کوونکي د چاپېريال دوستانه چلند خپلولو ته وهڅوي.
ويناوالو د طبيعي سرچينو پر بې رويه استعمال اندېښنه څرګنده کړه او ويې ويل چې د چاپېريال ساتنه يوازې د ادارو نه، بلکې د ټولنې د هر وګړي ګډ مسووليت دی.
د غونډې په پای کې د سکول زده کوونکو د چاپېريال نړيوالې ورځې په مناسبت په اردو او انګليسي ژبو ويناوې وکړې چې د ګډونوالو له خوا وستايل شوې.
همدارنګه د ندا پاکستان له خوا مېلمنو ته يادګاري شيلډونه ورکړل شول او هغو زده کوونکو ته ستاينليکونه او شيلډونه هم ووېشل شول چې په پروګرام کې يې غوره کارکردګي وښودله.
.jpeg)
