راولپنډۍ (شال نیوز) : د پاکستان د پوځ ویاند لېفټننټ جنرل احمد شریف چودري ویلي چې په خېبر پښتونخوا کې به د وسله والو ډلو پر ضد د استخباراتي معلوماتو پر بنیاد عملیات نور هم زیات کړي، خو د پراخو پوځي عملیاتو د پیلولو خبره یې رد کړې ده.

نوموړي د اکتوبر پر ۳۰مه له رویټرز خبري اژانس سره په مرکه کې ویلي چې پوځ به د ترهګرۍ پر ضد خپلې موجودې کارروایۍ جاري ساتي او د استخباراتي معلوماتو له مخې به عملیات نور هم چټک کړي.

د پوځ ویاند دا څرګندونې په داسې وخت کې کړې دي چې د پاکستان مرکزي حکومت د اکتوبر پر ۱۱مه په خېبر پښتونخوا کې د تحریک انصاف په مشرۍ صوبايي حکومت معطل کړی او اعلی وزیر سهیل اپریدی یې په حراست کې اخستی دی.

مرکزي حکومت تور پورې کړی چې صوبايي حکومت د وسله والو ډلو د فعالیتونو په مخنیوي کې پاتې راغلی و، خو تحریک انصاف دغه تورونه رد کړي دي. د ګوند مشرانو ویلي چې صوبايي حکومت د ترهګرۍ پر ضد هڅو کې برخه اخستې وه او د حکومت معطل کول یې د سیاسي احتجاجونو د ځپلو هڅه بللې ده.

له احمد شریف چودري څخه په مرکه کې پوښتنه شوې چې ایا له دغو سیاسي بدلونونو وروسته به په خېبر پښتونخوا کې پراخ پوځي عملیات پیل شي؟ نوموړي په ځواب کې ویلي چې د پوځ د ترهګرۍ ضد تګلاره د استخباراتي معلوماتو پر بنیاد پر عملیاتو ولاړه ده او دغه کارروایۍ به نورې هم زیاتې شي.

په خېبر پښتونخوا کې له تېرو څو کلونو راهیسې امنیتي حالات خراب دي. په ځانګړي ډول په بنو، لکي مروت، شمالي او سویلي وزیرستان، ټانک او ډېره اسماعیل خان کې د وسله والو بریدونو او د امنیتي ځواکونو د کارروایو راپورونه ورکول کېږي.

د اکتوبر پر ۳۰مه په بنو کې د سي ټي ډي دوه اهلکار په دوو جلا پېښو کې ووژل شول. په لکي مروت کې هم یو پولیس عسکر په ډزو ووژل شو. پولیسو ویلي چې وروسته یې په کارروایۍ کې دوه مشکوک وسله وال وژلي دي.

په کوز سویلي وزیرستان کې د وانا په سیمه کې هم د غلام حسین په نوم یو پولیس عسکر د نامعلومو وسله والو په ډزو وژل شوی دی.

د پوځ د ویاند له څرګندونو سره سره لا دا نه ده روښانه شوې چې د استخباراتي عملیاتو زیاتوالی به د خېبر پښتونخوا کومې ضلعې رانغاړي او ایا د دې لپاره به نور امنیتي ځواکونه هم ځای پر ځای کېږي.

په قبایلي ضلعو کې د پوځي عملیاتو موضوع له دې امله هم مهمه ده چې د دغو سیمو اوسېدونکي په تېرو کلونو کې د جګړو، د کورونو پرېښودو او د کاروبارونو د بندېدو له ستونزو سره مخ شوي دي.

د پوځ ویاند په خپله مرکه کې د ایران او امریکا ترمنځ د پاکستان د منځګړیتوب په اړه هم خبرې کړې دي. احمد شریف چودري ویلي چې پاکستان د دواړو هېوادونو ترمنځ د خبرو د پرمختګ هیله لري، خو په دې اړه له احتیاطه کار اخلي.

د نوموړي په وینا، د پوځ مشر فیلډ مارشل عاصم منیر د اکتوبر په میاشت کې دوه ځله تهران ته تللی دی. هغه ویلي چې د دغو سفرونو تکرار د منځګړیتوب په هڅو کې د مثبت پرمختګ نښه کېدای شي.

خو د پوځ ویاند دا نه دي ویلي چې په تهران کې پر کومو مشخصو موضوعاتو خبرې شوې دي او ایا امریکا د وروستي سفر ملاتړ کړی و. د پوځ د ویاند له څرګندونو ښکاري چې په خېبر پښتونخوا کې د استخباراتي عملیاتو د زیاتولو پرېکړه شوې، خو د کومو نویو پراخو پوځي عملیاتو اعلان نه دی شوی.