کابل (شال نیوز) : د امارتي شرکتونو لوی ریاست اړوند د ښاري اوبو رسولو او فاضلابو امارتي شرکت له یوه خصوصي شرکت سره د شاوخوا یو میلیارد افغانیو په ارزښت له شاه او عروس بند څخه د کابل ښار اوولسمې ناحیې ته د اوبو د لېږد پروژې تړون لاسلیک کړی دی.

 

د ښاري اوبو رسولو او فاضلابو امارتي شرکت د معلوماتو له مخې، د دې پروژې اساسي موخه د کابل ښار په اوولسمه ناحیه کې د څښاک پاکو اوبو د کمښت ستونزې ته رسېدنه او د سیمې اوسېدونکو ته د اوبو د رسولو د خدمتونو پراختیا ده.

 

یاد شرکت وایي، د پروژې په بشپړېدو سره به د کابل ښار په اوولسمه ناحیه کې شاوخوا ۵۰ زره کورنۍ د څښاک پاکو اوبو ته لاسرسی ومومي. تمه ده چې د دې پروژې پلي کېدل به د سیمې اوسېدونکو ته د اوبو رسولو په برخه کې اسانتیاوې برابرې کړي.

 

د دغه شرکت د معلوماتو له مخې، د یادې پروژې په چوکاټ کې به په هره ثانیه کې ۱۰۰ لیټره سطحي اوبه له شاه او عروس بند څخه او ۱۰۰ لیټره اوبه له پنځو څاګانو څخه د کابل ښار اوولسمې ناحیې ته ولېږدول شي. په دې توګه به د اوبو د لېږد لپاره له دوو سرچینو ګټه واخیستل شي.

 

د اوبو رسولو د دې پروژې پلي کېدل په داسې حال کې دي چې د کابل ښار د نفوسو له زیاتوالي سره د څښاک پاکو اوبو ته د خلکو اړتیا هم زیاته شوې ده. د اوبو د سرچینو پراختیا او د اوبو رسولو د شبکو پیاوړتیا د ښار د اوسېدونکو د اړتیاوو د پوره کولو لپاره مهمه بلل کېږي.

 

د ښاري اوبو رسولو او فاضلابو امارتي شرکت د معلوماتو له مخې، د دې پروژې په بشپړېدو سره به د کابل ښار په اوولسمه ناحیه کې زرګونه کورنۍ د څښاک پاکو اوبو ته لاسرسی پیدا کړي او د سیمې د اوبو رسولو په برخه کې به یو مهم ګام واخیستل شي.