هرات (شال نیوز) : د طالبانو د ټولګټو چارو وزارت ویاند، محمد اشرف حق‌شناس خبر ورکړی چې د هرات-خواف د اوسپنې پټلۍ او د ایران د ریل پټلۍ شبکې له لارې ۶۰۰ ټنه پنبه په بریالیتوب سره ترکیې ته صادره شوې ده.

 

حق‌شناس څرګنده کړې چې دغه سوداګریزه جوپه د افغانستان او د سیمې د هېوادونو ترمنځ د سوداګریزو او ټرانزیټي اړیکو د پراختیا په موخه لېږدول شوې ده. د نوموړي په وینا، د دې جوپې لېږد د افغانستان د ټرانزیټي ظرفیتونو اغېزمنه کارونه او د صادراتو لپاره د بدیلو لارو پراختیا په ډاګه کوي.

 

د ټولګټو چارو وزارت د معلوماتو له مخې، د هرات-خواف د اوسپنې پټلۍ د افغانستان له مهمو ټرانزیټي مسیرونو څخه ده چې د ایران له لارې افغانستان د سیمې له نورو ریل پټلۍ شبکو سره نښلوي.

 

دغه مسیر د سوداګریزو توکو په لېږد رالېږد کې د وخت او لګښتونو په کمولو، د صادراتو په زیاتولو او د سیمه‌ییزو اقتصادي همکاریو په پیاوړتیا کې مهم رول لري.

 

د هرات-خواف د اوسپنې پټلۍ له لارې د توکو لېږد د افغانستان سوداګرو ته دا زمینه برابروي چې خپل محصولات د ځمکنیو ټرانسپورټي لارو ترڅنګ د ریل پټلۍ له لارې هم بهرنیو بازارونو ته ورسوي.

 

د دې لارې کارونه کولای شي د صادراتي توکو د لېږد بهیر اسانه کړي او له سیمه‌ییزو ټرانزیټي دهلېزونو سره د افغانستان اړیکې پراخې کړي. پنبه د افغانستان له مهمو کرنیزو محصولاتو څخه ده او بهرنیو بازارونو ته یې صادرول د کرنیزو محصولاتو د بازارموندنې او د هېواد د صادراتو د پراختیا لپاره ارزښت لري.

 

د ۶۰۰ ټنه پنبې دغه صادرات په داسې حال کې ترسره کېږي چې د افغانستان د سوداګرۍ او ټرانزیټ لپاره د سیمه‌ییزو لارو کارونه د اقتصادي اړیکو د پراختیا په برخه کې مهم بلل کېږي.