پکتیکا (شال نیوز) : د طالبانو د حکومت د اوبو او انرژۍ وزارت ویلي چې د پکتیکا ولایت د پلتوني بند د جوړولو چارې ۳۵ سلنه بشپړې شوې دي.
د وزارت د معلوماتو له مخې، دغه بند به د ۲۵ میلیونه متر مکعب اوبو د زېرمه کولو وړتیا ولري او له بشپړېدو وروسته به یې شاوخوا دوه زره او ۵۰۰ هکټاره کرنیزه ځمکه خړوبه شي.
د پلتوني بند له اوبو څخه به د کرنې ترڅنګ د برېښنا د تولید لپاره هم کار اخیستل کېږي. د وزارت په وینا، دغه بند به د ۰.۹ مېګاواټه، یعنې ۹۰۰ کیلوواټه برېښنا د تولید ظرفیت ولري.
د اوبو او انرژۍ وزارت ویلي چې د بند په بشپړېدو سره به په پکتیکا کې د اوبو د زېرمه کولو امکانات زیات شي، کروندګرو ته به د خپلو ځمکو د خړوبولو لپاره اوبه برابرې شي او د کرنې او صنعت په پراختیا کې به مرسته وشي.
پکتیکا د افغانستان له هغو ولایتونو څخه دی چې د خلکو د ژوند یوه مهمه برخه یې له کرنې او مالدارۍ سره تړلې ده. په دغه ولایت کې د اوبو د زېرمه کولو او د کرنیزو ځمکو د خړوبولو لپاره د بندونو جوړول د کروندګرو لپاره ځانګړی اهمیت لري.
د اوبو د زېرمه کولو د کافي امکاناتو نشتوالی او د بارانونو په اوبو تکیه د کروندګرو له مهمو ستونزو څخه ګڼل کېږي. د پلتوني بند په څېر پروژې کولای شي د اوبو په منظم استعمال او د کرنیزو ځمکو په خړوبولو کې مرسته وکړي.
خو دا لا نه ده څرګنده چې د دغه بند له اوبو به د پکتیکا د کومو سیمو کروندګر ګټه اخلي او د برېښنا د وېش لپاره به څه انتظام کېږي. د طالبانو د حکومت د اوبو او انرژۍ وزارت د پروژې ټول لګښت، د مالي سرچینو تفصیل او د بند د بشپړېدو نېټه هم نه ده څرګنده کړې.
همدارنګه، وزارت دا معلومات نه دي ورکړي چې د بند پاتې ۶۵ سلنه کار به په څومره موده کې بشپړ شي. د وزارت له خوا اعلان شوې شمېرې ښيي چې د پلتوني بند له بشپړېدو سره به د اوبو د زېرمه کولو، د کرنیزو ځمکو د خړوبولو او د برېښنا د تولید امکانات برابر شي، خو د دغو ګټو ترلاسه کېدل د پروژې په بشپړېدو او عملي فعالیت پورې تړلي دي.


شال نیوز