صوابۍ (شال نیوز) : د صوابۍ پولیس وايي، د ضلعې په اتله سیمه کې یې یو کس د خپلې خور او خورزې د وژلو په تور نیولی دی.

 

د صوابۍ پولیسو د اکتوبر پر درېیمه په خپره کړې خبرپاڼه کې ویلي، نیول شوی کس تاج بهادر نومېږي او تور پرې دی چې د ټک ټاک ویډیوګانو پر سر تر شخړې وروسته یې پر خپلې خور مسرت بي بي او د هغې پر لور انم ډزې کړې او دواړه یې وژلې دي.

 

پولیس وايي، شخړه هغه مهال پیل شوه چې تاج بهادر د خپل خوریي سلمان د ټک ټاک ویډیوګانو پر جوړولو اعتراض وکړ. د پولیسو په وینا، نوموړي په دې اړه له خپلې خور سره هم شخړه کړې وه.

 

د پولیسو د لومړنیو معلوماتو له مخې، وروسته چې تاج بهادر د خپل خوریي یوه بله ټک ټاک ویډیو ولیده، په غوسه شو او ډزې یې وکړې. په ډزو کې مسرت بي بي او د هغې لور انم ووژل شوې، خو سلمان ته زیان نه دی رسېدلی.

 

د صوابۍ د پولیسو مشر وقاص رفیق ویلي، له پېښې وروسته پولیسو د تورن کس د نیولو لپاره عملیات پیل کړل. پولیس وايي، د ټوپۍ د پولیسو د افسر نیاز ګل خان په مشرۍ او د اتله تاڼې د مشر سیدالامین خان په ګډون پولیسو په بېلابېلو ځایونو چاپې ووهلې او تاج بهادر یې ونیو.

 

د پولیسو په وینا، د تاج بهادر پر ضد مقدمه درج شوې او د پېښې په اړه نورې پلټنې روانې دي. د پولیسو په خبرپاڼه کې د تورن کس دریځ نه دی ورکړل شوی او تر اوسه معلومه نه ده چې هغه په رسمي ډول پر جرم تورن شوی او که نه.