شال نیوز
کابل (شال نیوز) : د جمعیت اسلامي افغانستان یو مشر او د بلخ پخواني والي عطا محمد نور د طالبانو ځینو وسلهوالو مخالفانو ته خبرداری ورکړی چې که د ده په وینا «له حدودو واوړي»، دی به د هغوی د روزنې د مرکزونو، مالي ملاتړ، قومندانانو او نورو فعالیتونو په اړه معلومات افشا کړي.
دا څرګندونې وروسته له هغې شوې چې نور د شنبې، د سپټمبر ۲۶مې، د تلې ۴مې په ورځ د نورستان په کامدېش او د کونړ په نرۍ ولسوالۍ کي د طالبانو او د افغانستان د ازادۍ جبهې د ځواکونو ترمنځ د نښتو په تړاو په تلویحي ډول د طالبانو پر وسلهوالو مخالفانو نیوکه وکړه.
نور په خپله لومړۍ لیکنه کي ویلي وو چې چریکي جګړه «ستراتیژیک لید، تجربه او پخو او مسؤلانه پلانونو» ته اړتیا لري. هغه له مشخصې ډلې د نوم اخیستو پرته ویلي وو چې افغان ځوانان باید «د پردیو د خوشحالولو او شهرت» لپاره جګړې ته ونه لېږل شي. هغه ویلي، د افغانستان ازادي باید د افغانانو د خپلواک هوډ له لارې ترلاسه شي، نه د بهرنیو قدرتونو د نیابتي ځواک په توګه.
د نور دا څرګندونې وروسته له هغې وشوې چې د افغانستان د ازادۍ جبهې وویل، د سپټمبر پر ۲۶مه یې د نورستان په کامدېش ولسوالۍ کي له طالبانو سره نښتې کړې دي. جبهې د طالبانو د څو پوستو د نیولو او د کامدېش او د کونړ د نرۍ ولسوالۍ له ځینو سیمو څخه د طالبانو د شاتګ ادعا هم کړې وه. د دغو ادعاوو خپلواک تایید نه دی شوی.
د طالبانو د مخالفو وسلهوالو ډلو له لوري د نور پر څرګندونو نیوکې وشوې او د طالبانو پر ضد وسلهواله مبارزه یې مشروع وبلله. له دې غبرګونونو وروسته نور په بله لیکنه کي ویلي چې د خلکو «منصفانه نقد او تحلیل» مني، خو د ده په وینا هغو کسانو ته به اجازه ورنه کړي چې د بهرنیو استخباراتي ادارو له خوا روزل شوي وي او د هغه سپکاوی وکړي.
نور خبرداری ورکړی چې که دا لړۍ دوام وکړي، دی به د طالبانو د ځینو وسلهوالو مخالفانو د روزنې د مرکزونو، د مالي ملاتړ د سرچینو، قومندانانو او نورو موضوعاتو په اړه معلومات خپاره کړي. هغه په عین وخت کي د طالبانو ټول وسلهوال مخالفان په یوه کتار کي نه دي درولي او ویلي یې دي چې د طالبانو پر ضد یو شمېر کسان «خپلواک» مبارزه کوي او دی یې ملاتړ کوي.
د نور د وروستي ګواښ هغه جزئیات چې د روزنیزو مرکزونو او مالي سرچینو د افشا کولو خبره پکي شوې، شال نیوز تر اوسه له یوې بلې خپلواکې سرچینې نه دي تایید کړي.
د عطا محمد نور د څرګندونو له امله د طالبانو د مخالفو ډلو ترمنځ دا بحث په داسې وخت کي مخې ته راغلی چې په نورستان او کونړ کي د وروستیو نښتو د تلفاتو، د سیمو د کنټرول او د جګړې د بهرني ملاتړ په اړه د ښکېلو خواوو ادعاوې یو له بل سره توپیر لري.
.jpeg)
