شال نیوز
واشنګټن (شال نیوز) : د امریکا ولسمشر ،ډونالډ ټرمپ، د چین د ولسمشر ،شي جینپینګ، واشنګټن ته د رسېدو پر مهال په جواینټ بېس اېنډروز پوځي هوايي ډګر کې هرکلی کړی دی. دا د یوه بهرني مشر لپاره د امریکا د ولسمشر له خوا په هوايي ډګر کې د هرکلي یوه کم سارې بېلګه بلل شوې ده.
شي جینپینګ د سپتمبر پر ۲۳مه له خپلې مېرمنې پینګ لییوان سره واشنګټن ته ورسېد. ټرمپ او مېرمن یې میلانیا ټرمپ د الوتکې تر زینو ورغلي وو او هلته یې د چین د ولسمشر او مېرمنې هرکلی وکړ.
د هرکلي لپاره سور غالی غوړول شوی و، د امریکا پوځي سرتېري ولاړ وو او د دواړو هېوادونو ملي سرودونه وغږول شول. د مراسمو پر مهال د امریکا دوه بي ـ ۱ بم غورځوونکې الوتکې هم د هوايي ډګر له پاسه تېرې شوې.
د امریکا ولسمشران معمولاً بهرني مشران په سپینه ماڼۍ کې هرکلی کوي او په هوايي ډګر کې د ولسمشر شخصي هرکلی په وروستیو لسیزو کې کم لیدل شوی دی.
د ټرمپ او شي تر رسمي لیدنې مخکې د امریکا د خزانې وزیر سکاټ بېسنټ ویلي، واشنګټن او بیجینګ هوکړه کړې چې د دواړو هېوادونو ترمنځ سوداګریز اوربند تر جنورۍ وغځوي.
بېسنټ ویلي، هغه هوکړه چې د امریکا او چین ترمنځ یې د تعرفو د جګړې یوه برخه درولې وه، اوس به د ۲۰۲۷ کال د جنورۍ تر ۱۰مې دوام وکړي.
د امریکا او چین ترمنځ په وروستیو کلونو کې د تعرفو، پرمختللو کمپیوټري چپسونو، نادرو معدني موادو او نورو سوداګریزو محدودیتونو پر سر اختلافونه زیات شوي دي.
ټرمپ او شي د سپټمبر پر ۲۴مه په سپینه ماڼۍ کې رسمي خبرې کوي. تمه ده چې سوداګري، مصنوعي ځیرکتیا، تایوان، ایران او مهم معدني مواد د دوی د خبرو له مهمو موضوعاتو څخه وي.
دا په څه باندې یوه لسیزه کې واشنګټن ته د شي جینپینګ لومړی سفر دی. د هغه وروستی رسمي دولتي سفر په ۲۰۱۵ کال کې د بارک اوباما د ولسمشرۍ پر مهال شوی و.
سپینه ماڼۍ د شي په درناوي رسمي مېلمستیا هم کوي چې د امریکا د ټکنالوژۍ او سوداګرۍ یو شمېر مخکښې څېرې ورته بلل شوې دي.
د دواړو مشرانو د سفر په پیل کې د سوداګریز اوربند غځول لومړنی اعلان شوی پرمختګ دی، خو د تعرفو، ټکنالوژۍ او نورو اختلافي موضوعاتو په اړه به د رسمي خبرو پایلې وروسته روښانه شي.
.jpeg)
