اسلام‌ اباد : د پاکستان په رسنیو کې راپورونه خپاره شوي چې وفاقي حکومت د سپتمبر پر ۲۷مه اسلام‌ اباد ته د پاکستان تحریک انصاف د اعلان شوي لانګ مارچ لپاره له پنجاب، سیند او بلوچستان څخه ۲۳ زره ۵۰۰ پولیس اهلکار غوښتي دي.

ډان او اج نیوز د سرچینو له قوله ویلي دي، چې له پنجاب څخه ۱۵ زره، له سیند څخه اته زره او له بلوچستان څخه ۵۰۰ پولیس غوښتل شوي او صوبو ته ویل شوي چې د سپتمبر تر ۲۰مې یې اسلام‌ اباد ته ورسوي.

خو د پاکستان د اطلاعاتو او خپرونو وزارت د دې غوښتنې په اړه په ټولنیزو رسنیو کې خپور شوی لیک جعلي بللی او ویلي یې دي چې وفاقي حکومت په رسمي ډول د ۲۳ زره ۵۰۰ پولیسو د غوښتنې دغه لیک نه دی جاري کړی. له همدې امله تر اوسه د دې شمېر پولیسو د رسمي غوښتنې په اړه د حکومتي ادارو او رسنیزو راپورونو ترمنځ اختلاف شته.

په همدې حال کې په اسلام‌ اباد او راولپنډۍ کې د پي ټي ایي د لانګ مارچ لپاره امنیتي تیاري روانې دي. راپورونه وايي، چې په اسلام‌ اباد کې له زرو زیات کنټېنرونه هم د اړتیا پر مهال د لارو د بندولو لپاره برابر شوي دي.

اسلام‌ اباد هایکورټ د سپتمبر پر ۱۴مه د لانګ مارچ په اړه عریضه فیصله کړه او د صوبو وزیراعلیانو ته یې ویلي چې په سیاسي احتجاجونو کې دې دولتي وسایل نه کارول کېږي. عدالت دا هم ویلي چې هېڅ سیاسي ګوند یا مشر د سړکونو، لویو لارو او نورو عامه ځایونو د نیولو قانوني حق نه لري.

پي ټي ایي د سپتمبر پر ۲۷مه اسلام‌ اباد ته د لانګ مارچ اعلان کړی او وايي، د دې احتجاج مهمه غوښتنه د ګوند د بنسټګر عمران خان خوشي کول دي.