اسلام‌ اباد : د سویلي اسیا د اولمپیک کونسل اجراییوي کمېټۍ پرېکړه کړې ده چې د سویلي اسیا ۱۴مې لوبې به د ۲۰۲۷م کال د اپرېل له ۳مې تر ۱۱مې په پاکستان کې ترسره شي.

د کونسل اجراییوي کمېټۍ ،د اګست په ۲۳مه، په اسلام‌ اباد کې د غونډې پر مهال د لوبو نوې نېټې او د سیالیو پروګرام وروستی کړی دی. د نیپال اولمپیک کمېټۍ هم د دغې پرېکړې پخلی کړی دی.

تر دې وړاندې د روان کال په جنورۍ کې د سویلي اسیا د اولمپیک کونسل غړو پرېکړه کړې وه چې لوبې به د ۲۰۲۷م کال د مارچ له ۲۳مې تر ۳۱مې ترسره کېږي، خو د اسلام‌ اباد په تازه غونډه کې دغه مهالوېش بدل او سیالۍ د اپرېل لومړۍ اوونۍ ته وځنډول شوې.

د تازه پرېکړې له مخې، په سیالیو کې به ۲۸ لوبې شاملې وي او د پاکستان ترڅنګ به بنګله‌ دېش، بوټان، هند، مالدیف، نیپال او سریلانکا ګډون کوي.

د سویلي اسیا د اولمپیک کونسل له خوا تر دې وړاندې منظور شوي پروګرام کې کرکټ، فوټبال، هاکي، باسکټبال، والیبال، کبډي، سوک‌ وهنه، غېږ، ټېکوانډو، ووشو، کراټې، جودو، لامبو، اتلتیک، نښه ویشتل، سکواش، ټېنس، ټېبل ټېنس، وزن پورته کول، غشي ویشتل، بېډمنټن، ګالف، فېنسنګ، ټرایټلون، هینډبال، رګبي او نورې سیالۍ شاملې دي.

افغانستان، چې په پخوانیو سویلي اسیايي لوبو کې یې ګډون کړی و، د کونسل د اوسنیو اوو ګډونوالو هېوادونو په فهرست کې شامل نه دی. د ۲۰۱۶م کال په ۱۲مو سویلي اسیايي لوبو کې افغانستان هم ګډون کړی و، خو د ۲۰۱۹م کال په ۱۳مو لوبو کې د ګډونوالو شمېر اوو هېوادونو ته راکم شوی و.

پاکستان ته د دغو لوبو د کوربه‌ توب حق د ۲۰۱۹م کال د ۱۳مو سویلي اسیايي لوبو تر پای وروسته ورکړل شوی و، خو ۱۴مې لوبې له هغه وخت راهیسې څو ځله ځنډېدلې دي. په یو پخواني پلان کې ټاکل شوې وه چې سیالۍ د ۲۰۲۶م کال په جنورۍ کې وشي، وروسته ۲۰۲۷م کال د مارچ میاشت وټاکل شوه او اوس وروستۍ نېټه د اپرېل له ۳مې تر ۱۱مې ټاکل شوې ده.

د اګست پر ۲۲مه یوازې دا خبر ورکړل شوی و چې د سویلي اسیا د اولمپیک کونسل استازي په اسلام‌ اباد کې د لوبو د چمتووالي د ارزونې لپاره غونډه کوي. د اګست ۲۳مې نوی پرمختګ دا دی چې د لوبو نوې نېټې او د ۲۸ لوبو پروګرام اوس په رسمي توګه وروستی شوی دی.