لاهور / اسلام اباد : د پاکستان کسان بورډ اعلان کړی دی چې د جماعت اسلامي د احتجاج ملاتړ کوي او ،د اګست په ۷مه، به د هېواد په بېلابېلو سیمو کې د سړکونو بندولو په اقدام کې برخه واخلي.

 

د بورډ مشر سردار ظفر حسین خان ،د اګست په ۳مه، په لاهور کې خبري غونډې ته وویل چې دا احتجاج د پټرولو او ډیزلو د لوړو بیو، د تېلو لېوي او د کروندګرو د ستونزو پر ضد دی. هغه زیاته کړه چې د سون‌ توکو د ګرانۍ له امله د کرنیزو چارو لګښتونه زیات شوي، خو د غنمو مناسب نرخ نه ورکول کېږي. هغه د حکومت د غنمو د برامد تګلاره ناکامه وبلله او له نورو کروندګرو تنظیمونو یې هم د ګډون غوښتنه وکړه.

 

بل لور ته، د وفاقي کابینې اقتصادي رابطې کمېټۍ د یو میلیون ټنه غنمو د برامد منظوري ورکړې ده. حکومت وايي چې دا اقدام د اړتیا پوره کولو او د غنمو او اوړو د بیو د کنټرول لپاره دی. د چارواکو په وینا، صوبو شاوخوا ۲.۲ میلیون ټنه غنم غوښتي، چې ۱.۲ میلیون ټنه به له پاسکو زېرمو ورکړل شي او پاتې یو میلیون ټنه به برامد شي.

 

خو د برامد له اعلان سره سره د غنمو او اوړو بیې لوړې شوې دي. د جولایۍ تر ۳۰مې د سرکاري سروې له مخې، د ۱۰ کیلو غنمو اوسط بیه له ۱،۱۷۹ څخه ۱،۲۲۳ روپیو ته لوړه شوې او د ښه اوړو بیه له ۱۴۸ څخه ۱۵۲.۱۴ روپیو ته رسېدلې ده.

 

بازاري کارپوهان وايي چې برامد شوي غنم بازار ته د رسېدو لپاره ۲–۳ میاشتې وخت غواړي، په داسې حال کې چې کروندګر د حکومت د پېر او وېش تګلاره د ستونزو اصلي لامل بولي.