تربت (شال نیوز) : د پاکستان د پوځ مشر او د دفاعي ځواکونو مشر فیلډ مارشل عاصم منیر د بلوچستان تربت ښار ته سفر کړی او هلته یې د سیمې د امنیتي حالاتو او د وسله والو پر ضد د روانو عملیاتو په اړه معلومات ترلاسه کړي دي.

 

د نومبر په ۱۹مه راډیو پاکستان د پوځ د معلوماتو له مخې ویلي چې عاصم منیر ته لوړپوړو پوځي افسرانو په بلوچستان کې د امنیتي حالاتو، د وسله والو د فعالیتونو او د هغوی پر ضد د روانو عملیاتو په اړه تفصیلي بریفنګ ورکړی دی.

 

د پوځ په وینا، په بلوچستان کې د هغو وسله والو ډلو پر ضد عملیات روان دي چې د پاکستان حکومت یې د بهرنیو هېوادونو په ملاتړ تورنوي. خو د دغو ډلو د بهرني ملاتړ په اړه د پاکستاني پوځ دعوه په خپلواکه توګه نه ده تایید شوې.

 

د عاصم منیر د سفر په اړه په خپرو شویو معلوماتو کې دا نه دي ویل شوي چې په وروستیو عملیاتو کې څومره وسله وال وژل شوي یا نیول شوي او امنیتي ځواکونو ته څومره مرګ ژوبله اوښتې ده.

 

تربت د بلوچستان د کېچ ضلعې مرکز دی. دا د صوبې له هغو سیمو څخه دی چې په تېرو څو کلونو کې پکې پر امنیتي ځواکونو، سرکاري ودانیو او نورو ځایونو وسله وال بریدونه شوي دي.

 

په بلوچستان کې د بلوڅو بېلتون غوښتونکو وسله والو ډلو فعالیت له ډېرې مودې راهیسې د پاکستان د امنیتي ادارو لپاره یوه لویه مسئله ده. د بلوچستان د ازادۍ پوځ، چې په بي اېل اې مشهور دی، او ځینو نورو وسله والو ډلو په بېلابېلو وختونو کې د امنیتي ځواکونو او سرکاري ادارو پر ضد د بریدونو ذمه واري منلې ده.

 

پاکستاني چارواکي وايي، په بلوچستان کې د وسله والو پر ضد عملیات د امن د ټینګښت، د بریدونو د مخنیوي او د خلکو د ځان او مال د ساتنې لپاره ترسره کېږي.

 

بلخوا، د بلوچستان ځینو سیاسي ګوندونو، مدني فعالانو او د بشري حقونو تنظیمونو په وار وار د پوځي عملیاتو، د خلکو د جبري بې درکیو او د عامو وګړو د امنیت په اړه اندېښنې څرګندې کړې دي.

 

دوی غوښتنه کوي چې حکومت دې د امن د ټینګښت ترڅنګ د خلکو د حقونو خیال هم وساتي او د بې درکه کسانو د قضیو د حل لپاره دې عملي ګامونه پورته کړي. د پاکستان حکومت وايي، د جبري بې درکیو د قضیو د څېړلو لپاره قانوني لارې او اړوندې ادارې موجودې دي.

 

بلوچستان د پاکستان د رقبې له مخې تر ټولو لویه صوبه ده، چې له افغانستان او ایران سره ګډ سرحدونه لري. دا صوبه د معدني زېرمو، ګوادر بندر او د چین او پاکستان د اقتصادي دهلېز د پروژو له امله هم ځانګړی اهمیت لري.

 

د پوځ د مشر دا سفر په داسې وخت کې شوی چې د بلوچستان په بېلابېلو ضلعو کې د وسله والو بریدونو او امنیتي عملیاتو لړۍ روانه ده. تر اوسه د پوځ له خوا دا نه دي ویل شوي چې د عاصم منیر له سفر وروسته به په بلوچستان کې نوي عملیات پیل شي او که د روانو عملیاتو په تګلاره کې به کوم بدلون راشي.