اسلام‌اباد (شال نیوز) : په پاکستان کې د پخواني وزیراعظم او د تحریک انصاف د بنسټګر عمران خان د خوشې کېدو په اړه یو ځل بیا اوازې خپرې شوې دي. دا اوازې په داسې وخت کې زیاتې شوې چې د هغه دوې خویندې له جېل څخه خوشې شوې، وکیلانو یې ورسره لیدلي او د تحریک انصاف ځینو مشرانو د سیاسي کړکېچ د ختمولو لپاره د خبرو اترو غوښتنه کړې ده.

 

خو د پاکستان حکومت د عمران خان د خوشې کېدو لپاره د کومې پټې معاملې راپورونه رد کړي او ویلي یې دي چې د هغه د خوشې کېدو پرېکړه یوازې عدالتونه کولی شي. عمران خان له تېرو څو کلونو راهیسې د بېلابېلو مقدمو له امله د راولپنډۍ په اډیاله جېل کې بندي دی.

 

د نومبر په ۱۲مه د عمران خان دوې خویندې، عظمی خان او نورین نیازي، له ۵۳ ورځو بند وروسته د لاهور له کوټ لکهپت جېل څخه خوشې شوې. د دوی له خوشې کېدو وروسته په سیاسي حلقو او ټولنیزو رسنیو کې دا بحثونه زیات شول چې ښايي د حکومت او تحریک انصاف ترمنځ د اختلافاتو د ختمولو لپاره هڅې روانې وي.

 

خو تر اوسه داسې کوم ثبوت نه دی وړاندې شوی چې د عمران خان د خویندو خوشې کېدل دې د هغه د ممکنه خوشې کېدو لپاره د کومې معاملې برخه وي. په همدې حال کې د عمران خان وکیلانو سلمان صفدر او لطیف کهوسه په اډیاله جېل کې له هغه سره لیدلي دي.

 

لطیف کهوسه ویلي چې په دې لیدنه کې یې له عمران خان سره د پاکستان د مجوزې ۲۸مې آئيني ترمیم په ګډون پر سیاسي او قانوني چارو خبرې کړې دي. له دې لیدنې وروسته د تحریک انصاف مرکزي صدر چودري پروېز الهي هم د هېواد د سیاسي کړکېچ د ختمولو غوښتنه کړې ده.

 

پروېز الهي د نومبر په ۱۴مه له لطیف کهوسه سره تر لیدنې وروسته وویل چې د پاکستان اوسني حالات د سیاسي اختلافاتو د ختمولو غوښتنه کوي. هغه وویل چې په سیمه کې د بدلېدونکو حالاتو له امله په هېواد کې سیاسي ثبات ضروري دی او د اختلافاتو د حل لپاره باید د خبرو اترو لار خپله شي.

 

پروېز الهي له عمران خان سره د وکیلانو وروستۍ لیدنه مثبت پرمختګ بللی او ویلي یې دي چې دا ډول اړیکې باید دوام ومومي. بل لور ته د پاکستان د پارلماني چارو وفاقي وزیر ډاکټر طارق فضل چودري د عمران خان د خوشې کېدو لپاره د کومې سیاسي معاملې خبرونه رد کړي دي.

 

هغه ویلي چې حکومت له عمران خان سره کومه پټه معامله نه ده کړې او د هغه د خوشې کېدو مسئله له عدالتونو سره تړلې ده. د کورنیو چارو وزیر محسن نقوي هم د عمران خان د خوشې کېدو په اړه د پټو خبرو راپورونه رد کړي دي.

 

د تحریک انصاف مشر بېرسټر ګوهر علي خان ویلي چې له حکومت سره اړیکې شته، خو تر اوسه رسمي مذاکرات نه دي پیل شوي. هغه ویلي چې د پاکستان د سیاسي ستونزو د حل لپاره خبرې اترې ضروري دي.

 

د عمران خان د خوشې کېدو له اوازو سره د هغه د روغتیا مسئله هم یو ځل بیا د بحث موضوع ګرځېدلې ده. د نومبر د ۱۰مې او ۱۱مې ترمنځ شپه عمران خان د سترګې د علاج لپاره د اسلام‌اباد پمز هسپتال ته وړل شوی و.

 

د هسپتال چارواکو ویلي چې عمران خان ته طبي معاینه او علاج شوی او وروسته بېرته اډیاله جېل ته انتقال شوی دی. خو د تحریک انصاف مشران او د هغه د کورنۍ غړي د عمران خان د روغتیا په اړه اندېښنې څرګندوي او غوښتنه کوي چې شخصي ډاکټرانو ته دې ورسره د لیدنې اجازه ورکړل شي.

 

په همدې حال کې د عمران خان او د هغه د مېرمنې بشریٰ بي بي د ۱۹۰ میلیونه پونډو د القادر ټرسټ مقدمې اپیلونه د اسلام‌اباد هایکورټ تر غور لاندې دي. ټاکل شوې چې د نومبر په ۱۸مه د دې مقدمې بله اورېدنه وشي.

 

د عمران خان وکیلان هڅه کوي چې په دې مقدمه کې د هغه د سزا خلاف قانوني دلایل وړاندې کړي. که څه هم دا اورېدنه د عمران خان د قانوني وضعیت لپاره مهمه بلل کېږي، خو تر اوسه داسې کومه پرېکړه نه ده شوې چې له مخې یې هغه په همدې ورځ خوشې شي.

 

په پاکستان کې له څه مودې راهیسې د عمران خان او د پوځي مشر فیلډ مارشل عاصم منیر ترمنځ د اختلافاتو د ختمولو په اړه هم اټکلونه کېږي. ځینې سیاسي حلقې د پردې تر شا د خبرو اترو امکان یادوي، خو تر اوسه نه د حکومت، نه د پوځ او نه هم د تحریک انصاف له خوا داسې کومه معامله تایید شوې ده.

 

د عمران خان خور علیمه خان تر دې وړاندې ویلي وو چې ورور یې د خوشې کېدو په بدل کې سیاسي معامله نه مني. د عمران خان د خوشې کېدو په اړه وروستۍ اوازې تر ډېره د هغه د خویندو له خوشې کېدو، له وکیلانو سره د لیدنو او د سیاسي خبرو اترو له غوښتنو وروسته زیاتې شوې دي.

 

خو تر اوسه د عمران خان د خوشې کېدو کوم رسمي حکم نه دی اعلان شوی او نه هم د هغه د خوشې کېدو لپاره کومه نېټه ټاکل شوې ده. اوس به د نومبر د ۱۸مې عدالتي اورېدنه او د حکومت او تحریک انصاف راتلونکي ګامونه وښيي چې د عمران خان په قانوني او سیاسي وضعیت کې کوم نوی بدلون راځي او که نه.