کوهاټ (شال نیوز) : د خېبر پښتونخوا اعلا وزیر سهیل اپریدي یو ځل بیا ویلي، که وفاقي حکومت د وسله والو پر ضد خپله اوسنۍ تګلاره بدله او د صوبايي حکومت وړاندیزونه ومني، په خېبر پښتونخوا کې په ۱۰۰ ورځو کې امن راوستل کېدای شي.

اپریدي د اکتوبر پر شپږمه په کوهاټ کې د تحریک انصاف لانګ مارچ ګډونوالو ته وویل، په خېبر پښتونخوا کې له تېرو ۲۲ کلونو راهیسې پوځي عملیات او امنیتي اقدامات روان دي، خو د ده په وینا، د وسله والو بریدونه لا هم نه دي ختم شوي.

هغه وویل: «ستاسو ناکامه تګلاره وسله وال ختم نه کړل. ما ته اجازه راکړئ چې داسې تګلاره وړاندې کړم چې په ۱۰۰ ورځو کې امن راشي.»

سهیل اپریدي تر دې وړاندې هم د پېښور په اعلا وزیر هاوس کې د امن او امان یوې غونډې ته ورته خبره کړې وه. هغه ویلي وو چې نوې امنیتي تګلاره باید د خېبر پښتونخوا د حکومت، انتظامیې، پولیسو او نورو اړوندو خواوو په سلا جوړه شي.

د صوبايي حکومت په وینا، د پولیسو د پیاوړتیا لپاره له پرمختیايي بودجې ۳۵ اربه روپۍ ورکړل شوې او د پولیسو بودجه هم زیاته شوې ده. اپریدي وايي، یوازې پولیسو ته د وسایلو او پیسو ورکول د ناامنۍ ستونزه نه شي حل کولی او د وفاق په امنیتي تګلاره کې بدلون ضروري دی.

خو اعلا وزیر تر اوسه داسې بشپړ لیکلی پلان نه دی عام کړی چې وښيي په دغو ۱۰۰ ورځو کې به کوم مشخص امنیتي، سیاسي او انتظامي ګامونه پورته کېږي او د پلان د بریالیتوب د معلومولو معیارونه به څه وي.

له همدې امله «په ۱۰۰ ورځو کې د امن» خبره د سهیل اپریدي سیاسي او امنیتي دریځ دی، نه داسې پلان چې تر اوسه یې عملي جزییات په عامه توګه وړاندې شوي وي.

اپریدي دا څرګندونې داسې مهال کړې چې په خېبر پښتونخوا کې په وروستیو میاشتو کې د وسله والو بریدونه او د امنیتي ځواکونو عملیات روان دي او د صوبايي او وفاقي حکومتونو ترمنځ د امنیتي تګلارې پر سر اختلافات زیات شوي دي.