واشنګټن (شال نیوز) : د امریکا د بهرنیو چارو وزارت د افغانستان امریکايي پوهنتون ته د راتلونکو دوو کلونو لپاره د ۲۵ میلیونه ډالرو د مالي مرستې غوښتنه رد کړې او تمه ده چې د روان ۲۰۲۶ کال تر پایه دې پوهنتون ته پاتې امریکايي مالي مرسته هم بنده شي.

نیویارک ټایمز د پنجشنبې، د اکتوبر لومړۍ پر ورځ راپور ورکړی چې د بهرنیو چارو وزارت د سې‌شنبې په ورځ د پوهنتون د ۲۵ میلیونه ډالرو غوښتنه رد کړه. شال نیوز د نیویارک ټایمز اصلي راپور ته د لاسرسي د محدودیت له امله د دې پرېکړې ټول جزیات په خپلواکه توګه نه شي تاییدولی.

د افغانستان امریکايي پوهنتون اوس شاوخوا زر زده کوونکي لري چې درسونه په انلاین ډول تعقیبوي. د ورکړل شویو معلوماتو له مخې، نږدې درې پر څلورمه برخه یې ښځې دي او شاوخوا ۹۰ سلنه زده کوونکي په افغانستان کي ژوند کوي.

دا پرېکړه په ځانګړي ډول د هغو افغان ښځو لپاره مهمه ده چې د طالبانو له خوا په پوهنتونونو کي د ښځو پر زده کړو د بندیز له امله حضوري لوړو زده کړو ته لاسرسی نه لري او انلاین زده کړې ورته له محدودو پاتې لارو څخه یوه ده.

د افغانستان امریکايي پوهنتون مشر ډېوېډ اېډوارډز ویلي، د پوهنتون د فعالیت د دوام لپاره ورسره د قرغیزستان د منځنۍ اسیا له امریکايي پوهنتون سره د همکارۍ خبره شوې ده. خو د راپور له مخې، هغه پوهنتون دا مهال د افغانستان دننه زده کوونکو ته د لیرې زده کړو ورته پروګرام نه لري.

اېډوارډز د ۲۰۲۶ کال په مارچ کي د افغانستان امریکايي پوهنتون لنډمهالی مشر ټاکل شوی و. د پوهنتون اړوند ادارې په هغه وخت کي ویلي وو چې د افغانستان د زده کوونکو لپاره به د لوړو زده کړو د فرصتونو د دوام هڅه کوي.

د طالبانو له بیا واکمنېدو وروسته د افغانستان امریکايي پوهنتون خپل درسونه تر ډېره انلاین کړي دي. که د امریکا مالي مرسته په بشپړه توګه بنده شي، لا روښانه نه ده چې پوهنتون به په اوسني شکل د خپلو انلاین پروګرامونو د دوام لپاره بدیلې مالي سرچینې له کومه پیدا کوي.