نوي ډیلي: هند د افغانستان پر وړاندې ،د سپتمبر په ۱۵مه، دویمه شل اوریزه لوبه په اوو ویکټو وګټله او د دریو لوبو سیریز یې یوه لوبه مخکې دوه ـ صفر په خپل نوم کړ.

 

افغانستان لومړی بېټنګ وکړ او په ۲۰ اورونو کې یې د اتو ویکټو په تاوان ۱۵۹ منډې وکړې.

 

ابراهیم ځدراڼ د افغانستان لپاره ۳۷ منډې وکړې، خو افغان بېټسمېنان ونه توانېدل چې لویه ملګرتیا جوړه کړي. په وروستیو اورونو کې د راشد خان ۲۸ منډو افغانستان تر ۱۵۹ ورساوه. محمد نبي هم ۲۰ منډې وکړې.

 

د هند نیتیش کمار ریډي د افغانستان د منډو د چټکولو مخه ونیوله او په ۲۴ منډو یې درې ویکټې واخیستې. د ۱۶۰ منډو په ځواب کې هند له پېله تېز بېټنګ وکړ. سنجو سمسن او ابیشک شرما افغان بالران تر فشار لاندې راوستل او هدف ته یې لار اسانه کړه.

 

سمسن په یوازې ۲۲ بالونو ۵۷ منډې وکړې، په داسې حال کې چې ابیشک شرما په ۱۹ بالونو ۳۹ منډې وکړې. راشد خان د هند درې واړه ویکټې واخیستې، خو تر هغه هند هدف ته ډېر نږدې شوی و.

 

هند د ۱۶۰ منډو هدف په ۱۴ اعشاریه پنځو اورونو کې پوره کړ او په دې بریا سره یې سیریز هم وګاټه.