لندن : د بریتانیا وزیراعظم ،انډي برنهام، د سعودي عرب د هغې غوښتنې په اړه غور کوي چې له لندن څخه یې په یمن کې د حوثي ځواکونو پر ضد د پوځي مرستې غوښتنه کړې ده.

بلومبرګ ،د سپتمبر په ۱۵مه، د موضوع له معلوماتو لرونکو سرچینو څخه په حواله ویلي، سعودي عرب له بریتانیا غوښتي چې د باب المندب تنګي په سیمه کې د حوثي ځواکونو د پرمختګ د مخنیوي لپاره له سعودي ځواکونو سره عملیاتي مرسته وکړي او د توغندیو او ډرون بریدونو پر وړاندې د سعودي د تېلو د تاسیساتو په ساتنه کي همکاري وکړي.

د راپور له مخې، د بریتانیا حکومت سعودي عرب ته د پوځي سلاکارانو له استولو سره موافقه کړې، خو تر اوسه یې د جګړې لپاره د نورو برتانوي ځواکونو یا جنګي بېړیو د استولو پرېکړه نه ده کړې.

دا غوښتنه په داسې وخت کې شوې چې حوثي ځواکونو د یمن د سره سمندر پر غاړه سیمو کې پرمختګ کړی او په باب المندب کې یې مهمې سیمې نیولې دي. دغه تنګی د نړیوالو سوداګریزو او د انرژۍ د لېږد مهمه سمندري لار ده.

د بریتانیا حکومت د سپتمبر پر ۱۰مه د حوثیانو پر وروستیو بریدونو نیوکه کړې وه او ویلي یې وو چې پر سعودي عرب د توغندیو او ډرون بریدونه، په ځانګړي ډول د ملکي او د انرژۍ پر تاسیساتو بریدونه، د سیمې ثبات او د سره سمندر سوداګریزې لارې له خطر سره مخ کوي.

تر اوسه د بریتانیا حکومت په رسمي ډول نه دي ویلي چې د سعودي د تازه غوښتنې په ځواب کې به مستقیم پوځي عملیات کوي که نه.