شال نیوز
کندهار : د طالبانو مشر ملا هبت الله اخندزاده ویلي دي، چې په اوسني وخت کې علما د دین د خدمت، د ټولنې د اصلاح او د طالبانو د نظام د ساتنې مسوولیت لري. اخندزاده دا څرګندونې ،د سپتمبر په ۲مه، په کندهار کې د مدرسو له علماوو او مدیرانو سره په یو سیمینار کې کړې دي.
هغه ویلي:
«د انبیاوو او صحابه وو پر ځای نن ورځ علما کرام مقرر دي، علما کرام به د اسلام او دین لپاره مبارزه کوي.»
د طالبانو مشر له علماوو غوښتي دي چې خلک د دین پر اصولو پوه کړي، د هغوي د اخلاقو په اصلاح کې کار وکړي او په ټولنه کې د فساد او هغو کړنو د مخنیوي هڅه وکړي چې د دوي له نظره د شریعت خلاف دي.
اخندزاده علما د طالبانو د نظام د پیاوړتیا او کمزورۍ له مهمو لاملونو بللي او ویلي یې دي:
«په تاسو علماوو هم نظام جوړېږي او هم خرابېږي.»
هغه د مدرسو پر زده کوونکو د ځانګړې پاملرنې غوښتنه کړې او ویلي یې دي، چې د نن ورځې زده کوونکي به په راتلونکي کې د نظام مسوولان او د چارو پر مخ وړونکي وي.
اخندزاده له علماوو غوښتي دي چې د زده کوونکو پر عقیده، ذهن، اخلاقو او علمي روزنه تمرکز وکړي، له درس او مطالعې سره د هغوي مینه زیاته کړي او د تدریس او روزنې معیار لوړ کړي.
هغه همداراز ویلي دي، چې د طالبانو فرمانونه دې زده کوونکو ته تشریح شي او په مدرسو کې دې فقهي بحثونو او علمي مجلسونو ته پراختیا ورکړل شي.
د طالبانو مشر علم د اسلام او د انسان د ژوند لپاره مهم بللی او ویلي یې دي، چې له علم پرته انسان نه شي کولی په نړۍ کې خپل ژوند او پرمختګ په سمه توګه پر مخ یوسي.
.jpeg)
.jpeg)
.jpeg)