مجید بابر
پېښور : په پېښور کې له بحرین څخه د انټرپول په وسیله راوستل شوی مشهور مطلوب کس ،ممتاز، عرف «ممتازے» په داسې وخت کې د وسله والو په برید کې وژل شوی دی چې هغه د پېښور پولیسو په حراست کې و؛ دې پېښې یو ځل بیا د ښار د پولیسو د جرمونو ضد تګلارې، د مطلوبو کسانو د امنیت او په وروستیو میاشتو کې د پولیسو د سختو عملیاتو په اړه پوښتنې راپورته کړې دي.
پولیس وايي، چې ممتاز ،د اګست په ۳۱مه، د بحرین له چارواکو څخه تر ترلاسه کولو وروسته د اسلام اباد له هوايي ډګره پېښور ته راوړل کېده. د شاه پور تاڼې په حدودو کې، پر ناردرن بای پاس وسله والو د پولیسو پر کاروان ډزې وکړې. ممتاز ووژل شو او دوه پولیس افسران ټپیان شول.
د پېښور د پولیسو مشر، سي سي پي او ډاکټر میا سعید احمد، د برید پخلی کړی دی او پولیس وايي چې لومړنۍ پلټنې د ممتاز له شخصي دښمنیو او مخالفو ډلو سره د پېښې د ممکنه تړاو په ګډون له بېلابېلو اړخونو روانې دي.
خو اساسي پوښتنه دا ده چې یو داسې کس چې د انټرپول له لارې له بهر څخه راوستل شوی، د پولیسو تر مستقیمې څارنې او حراست لاندې څنګه د ښار تر رسېدو مخکې د وسله والو هدف وګرځېد؟
تر اوسه پولیسو دا نه دي ویلي چې د ممتاز د انتقال د لارې معلومات له کومو کسانو سره شریک وو، د هغه د انتقال لپاره څومره امنیت ټاکل شوی و، بریدګرو ته د پولیسو د موټرو د تګ راتګ په اړه معلومات څنګه رسېدلي وو او ولې د داسې یو لوړ خطر لرونکي مطلوب کس لپاره ځانګړی خوندي انتقال نه و ترتیب شوی.
دا پېښه د ډاکټر میا سعید احمد د پولیسۍ د هغې تګلارې په منځ کې شوې ده چې په تېرو میاشتو کې یې د پېښور پولیسو ته د غلو، وسله والو ډلو، قبضه مافیا، نشي توکو پلورونکو، په ټولنیزو رسنیو کې د وسلو ښودونکو او نورو مطلوبو کسانو پر ضد د سختو عملیاتو امرونه ورکړي دي.
ډاکټر میا سعید احمد د ۲۰۲۵م کال د اګست پر ۲۶مه د پېښور د پولیسو د مشر په توګه مقرر شوی و. هغه تر دې مخکې د خیبر پښتونخوا پولیسو د امنیتي څانګې ډي ايي جي و. د هغه تر مقررېدو وروسته د پېښور پولیسو په بېلابېلو عملیاتو کې د مطلوبو کسانو د نیولو او په مبینه پولیس مقابلو کې د کسانو د وژل کېدو راپورونه ورکړي دي.
تر ټولو تازه بېلګه یې د اګست پر ۳۰مه د یکه توت په سیمه کې عملیات وو. پولیس وايي، چې په دې عملیاتو کې د وقار عرف مېجر د یوې بین الصوبايي ډلې څلور غړي په مبینه مقابله کې ووژل شول او دوه نور کسان وتښتېدل.
پولیسو دعوه کړې ده چې وژل شوي کسان په خیبر پښتونخوا، پنجاب، سند او اسلام اباد کې د تښتونو، غلاوو، موټر تښتونو او نورو درنو جرمونو په لسګونو پېښو کې مطلوب وو. سي سي پي او ویلي دي، چې دغه ډله شاوخوا ۱۵ کاله فعاله وه او ،د پولیسو په وینا، یې په کراچۍ، راولپنډۍ، دیر، سوات، حیات اباد او چمکني کې د کروړونو روپیو غلاوې کړې وې.
د اګست پر ۱۹مه هم ډاکټر میا سعید د پولیسو په یو لوړپوړي اجلاس کې د ښار د تاڼو مشرانو ته ویلي وو چې د سټریټ کرایم، غلو ډلو، قبضه مافیا، مطلوبو کسانو او د «بدماشۍ» په نوم پېژندل شویو کسانو پر ضد عملیات چټک کړي.
په هغه غونډه کې د ځینو تاڼو پر مشرانو د جرمونو په مخنیوي کې د کمزورې کارکردګۍ له امله سختې نیوکې هم شوې وې او پولیسو ته ویل شوي وو چې د بیا بیا جرم کوونکو کسانو پر ضد دې جدي اقدام وشي.
د اګست پر ۲۸مه ډاکټر میا سعید هغو پولیس افسرانو ته نغدي انعامونه او ستاینلیکونه هم ورکړل چې د پولیسو په وینا یې د سټریټ کرایم او درنو جرمونو په قضیو کې ښه کار کړی و. دغه اقدامات ښيي چې د پېښور پولیسو مشرتابه د جرمونو پر ضد د فشار او سختو عملیاتو پالیسي خپله کړې ده.
خو د قانون له مخې مطلوب یا تورن کس، که هر څومره درنې دعوې پرې وي، تر عدالتي پرېکړې مخکې مجرم نه ګڼل کېږي. د پولیسو دنده د تورن کس نیول، عدالت ته وړاندې کول او د هغه د ژوند خوندیتوب هم دی.
همدا اصل د ممتاز قضیه له نورو پېښو جلا کوي.
ممتاز له پولیسو سره په جګړه کې نه دی وژل شوی. هغه نیول شوی و، د دولت په حراست کې و او د پولیسو له کاروان سره روان و چې وسله والو پرې برید وکړ. له همدې امله د دې پېښې په اړه یوازې دا پوښتنه نه راپورته کېږي چې ممتاز چا وواژه، بلکې دا هم چې هغه د پولیسو په حراست کې څنګه ووژل شو؟
د پېښور پولیس وايي، چې د بریدګرو د پېژندلو لپاره عملیات روان دي او د ممتاز له مخالفینو سره د برید د تړاو په ګډون ټول اړخونه څېړل کېږي. تر اوسه داسې خپلواک شواهد نه دي خپاره شوي چې وښيي د ممتاز وژل کېدل د پولیسو له خوا پلان شوي وو، او له موجودو معلوماتو څخه داسې نتیجه اخیستل مسلکي نه ده.
خو د هغه د پولیسو په حراست کې وژل کېدل، د پولیسو په وروستیو مبینه مقابلو کې د مطلوبو کسانو مرګونه او د سي سي پي او له خوا د جرمونو پر ضد د سختو عملیاتو امرونه هغه موضوعات دي چې د شفافې څېړنې، رسمي شمېرو او د هرې مبینې مقابلې د قانوني ارزونې غوښتنه کوي.
که پولیس دا عملیات د قانون مطابق بولي، نو د پېښور پولیسو لپاره مهمه ده چې دا هم روښانه کړي چې د ډاکټر میا سعید احمد له مقررېدو وروسته په څو پولیس مقابلو کې څو کسان وژل شوي، څو ژوندي نیول شوي، د څو مقابلو عدالتي یا مجسټرېټي پلټنه شوې او په څو پېښو کې د پولیسو پر بیان پوښتنې راپورته شوې دي.
همدا شمېرې به روښانه کړي چې په پېښور کې روانه تګلاره یوازې د جرمونو پر ضد سخت پولیس عملیات دي او که د پولیسو د ځواک د استعمال یوه پراخه بڼه رامنځته شوې ده.
.jpeg)
.jpeg)
.jpeg)
