لندن : پاکستاني تېز بالر محمد عباس د لارډز په دویم ټېسټ کې د خپل فرسټ کلاس کرکټ ۹۰۰ ویکټې پوره کړې او یو بل مهم پړاو ته ورسېد.

عباس د انګلستان د لومړۍ پاڼۍ پر مهال بېن ډکېټ وسوځاوه او همدا یې ۹۰۰مه فرسټ کلاس ویکټه وه. هغه په همدې پاڼۍ کې څلور لوبغاړي وسوځول او پاکستان یې د لوبې په مهم وخت کې بېرته سیالۍ ته راوست.

۳۶ کلن عباس د پاکستان له هغو تېز بالرانو څخه دی چې شهرت یې په لوړ رفتار نه، بلکې په کره لاین، لینت او د توپ په ناوخته حرکت جوړ شوی دی.

د هغه سفر هم عادي نه و. عباس د سیالکوټ ترڅنګ د جتېکې اوسېدونکی دی. د کرکټ له مسلکي کېدو وړاندې یې د روزګار لپاره په ویلډنګ او د څرمنې په فابریکه کې مزدوري کړې وه او د کور د لګښتونو لپاره یې نور کارونه هم کړي وو.

هغه په ۲۰۰۹م کال کې فرسټ کلاس کرکټ پېل کړ، خو د پاکستان ټېسټ لوبډلې ته تر رسېدو یې شاوخوا اته کاله انتظار وکړ. عباس په ۲۰۱۷م کال کې د ویسټ انډیز پر ضد خپله لومړۍ ټېسټ لوبه وکړه.

د عباس بالینګ د تېز رفتار پر ځای په کنټرول ولاړ دی. هغه کوشش کوي توپ په یو ټاکلي ځای کې بیا بیا واچوي، بېټسمېن تېروتنې ته مجبور کړي او له سېم څخه ناوخته حرکت واخلي. همدا طریقه هغه د اېل بي ډبلیو او د ویکټ تر شا د کېچونو لپاره خطرناک بالر ګرځوي.

عباس په خپلو پخوانیو مرکو کې ګلېن مکګرا او محمد اصف د خپل بالینګ له مهمو اغېزمنو کسانو بللي دي. هغه ویلي دي چې د لاین، لینت او د توپ د نیولو په اړه یې له اصف څخه هم زده کړه کړې ده.

لارډز د عباس لپاره له دې وړاندې هم د یاد وړ میدان پاتې شوی. هغه په ۲۰۱۸م کال کې د انګلستان پر ضد په همدې میدان کې اته ویکټې اخیستې وې او د لوبې غوره لوبغاړی ټاکل شوی و. اته کاله وروسته عباس یو ځل بیا په لارډز کې مهم رول ولوباوه، خو دا ځل یې د څلورو ویکټو تر څنګ د فرسټ کلاس کرکټ د ۹۰۰ ویکټو تاریخي حد هم پوره کړ.

عباس دا پړاو په خپل ۲۲۲م فرسټ کلاس میچ کې پوره کړ. د لارډز د لومړۍ پاڼۍ تر پای وروسته یې د فرسټ کلاس ویکټو شمېر ۹۰۲ ته ورسېد.

د محمد عباس د کیریر تر ټولو مهمه ځانګړنه دا ده چې هغه د تېز بالینګ په هغه زمانه کې ځان ثابت کړی چې رفتار ته ډېر اهمیت ورکول کېږي، خو ده ثابته کړې چې کره لاین، لینت، صبر او دوام هم د یوه تېز بالر تر ټولو لویې وسلې کېدی شي.