چین : د چین د هوا پېژندنې ملي مرکز د «ساودېل» توپان له امله سور خبرداری جاري کړی دی، چې د توپانونو لپاره د دغه هېواد تر ټولو لوړه د خبرداري درجه ده.

تمه ده توپان ،د اګست پر ۲۸مه، سهار د ژیجیانګ او فوجیان ساحلي سیمو ته ورسېږي. د هوا پېژندنې ادارې ویلي دي، چې له توپان سره به تېز بادونه، درانه بارانونه او لوړې سمندري څپې مل وي، چې په ځینو ساحلي سیمو کې د سېلابونو او ځمکې ښوېدنې خطر هم زیاتولی شي.

سیمه‌ ییزو ادارو کښتیو ته ویلي دي چې خوندي بندرونو ته ستنې شي او ساحلي سیمو کې مېشت خلک دې د چارواکو لارښوونې تعقیب کړي. د ځینو سمندري او ساحلي سفرونو د ځنډېدو یا بندېدو امکان هم شته.

په چین کې د امریکا سفارت هم خپلو وګړو ته خبرداری ورکړی او ویلي یې دي چې د توپان د تېرېدو پر مهال دې له غیر ضروري سفرونو ډډه وکړي او د سیمه‌ ییزو ادارو خبرتیاوې دې تعقیب کړي.

ژیجیانګ او فوجیان د چین له مهمو صنعتي او سوداګریزو ساحلي سیمو څخه دي. که توپان په زیات شدت ساحل ته ورسېږي، د بندرونو، سمندري تګ راتګ، بار وړلو او ځینو هوایي سفرونو چارې هم لنډمهاله اغېزمنېدی شي.

چارواکي وايي، چې د توپان لوری او شدت لا هم څارل کېږي او د اړتیا په صورت کې به نور احتیاطي اقدامات هم وشي.