کابل / لندن : په برتانیه کې د مسیحیانو د ځورونې د مطالعاتو لیندیس‌ فارن مرکز په یو تازه راپور کې ویلي دي، چې په افغانستان کې مسیحیان له پراخو مذهبي محدودیتونو او ځورونې سره مخ دي او ،د مرکز په ارزونه، د دې ځورونې ځینې بڼې د «بشریت ضد جرمونو» تر کچې رسېدی شي.

 

دغه ۱۲۵ مخیز راپور، چې د اګست پر ۳مه خپور شوی دی، وايي چې په افغانستان کې د مسیحیانو د کره شمېر معلومول ناشوني ته نږدې دي، ځکه ډېر یې خپل مذهبي هویت پټ ساتي. مرکز وايي، اټکل کېږي چې اوس هم څو زره افغان مسیحیان په هېواد کې دننه ژوند کوي؛ په تېرو کلونو کې ځینو سرچینو دا شمېر شاوخوا لس زره اټکل کړی و.

 

د مرکز په خبره، افغان مسیحیان رسمي مذهبي ټولنه نه لري او د طالبانو تر واکمنۍ لاندې په ښکاره توګه د عبادت، د عبادت ځایونو د جوړولو او د خپل مذهب د څرګندولو امکان نه لري.

 

راپور د نیولو، بندي کولو، شکنجې، د کورنیو له خوا د ګواښونو او د مذهب پر بنسټ د ځورونې د پېښو یادونه کوي. مرکز استدلال کوي چې هغه افغانان چې له اسلامه مسیحیت ته اوښتي وي، په ځانګړي ډول له جدي خطر سره مخ دي.

 

لیندیس‌ فارن مرکز خبرداری ورکړی دی چې که دا حالت دوام وکړي، د افغانستان د مسیحي ټولنې د بقا لپاره به جدي خطرونه پیدا شي او ځینې کړنې ښيي د نړیوال قانون له مخې د بشریت ضد جرمونو په تعریف کې راشي.

 

دا د مسیحیانو د ځورونې په اړه د یو برتانوي څېړنیز مرکز ارزونه ده او د راپور ځینې دعوې په خپلواکه توګه نه دي تایید شوې. طالبانو تر اوسه د دې راپور د مشخصو موندنو په اړه تازه رسمي غبرګون نه دی ښودلی.