د خیبر پښتونخوا د اعلا وزير ،محمد سهيل اپريدي، په مشرۍ کې د هزاره ډويژن د پرمختيايي پروژو، امن امان، ګورننس او سروس ډيليوري د جاج اخستو غونډه ترسره شوې ده.

د جولايۍ په ۳مه، شوې غونډې ته په وینا کې اعلا وزير د کوليي پالس او الایۍ په سیمو کې د نویو سیاحتي ځایونو د موندلو سپارښتنه وکړه او ویې ویل چې د هزاره پیکج له مخې د سیاحت د ودې لپاره ۵۰ کروړه روپۍ ځانګړې شوې دي او په دغو فنډونو کې به نور زیاتوالی هم راوستل شي.

هغه د کوليي پالس او بټګرام ترمنځ د چوړ مالي ویلي او بلیج ویلي د سرحدي لانجې د تلپاتې هواري لپاره د کمېشن د جوړولو امر هم وکړ.

نوموړي د پشکال موسم ته په کتو ټولو ادارو ته سپارښتنه وکړه چې چمتوالی وساتي او په سمدستي توګه دې بيړني پلانونه عملي کړي.

هغه وویل چې کورنیو او بهرنیو سیلانیانو ته باید غوره اسانتیاوې او مېلمه پالنه برابرې شي، ځکه سیلانیان د صوبې د مثبت انځور په وړاندې کولو کې د مهم رول لري. نوموړي د سېلګرۍ په سیمو کې د ټرافیک د روان ساتلو لپاره د ځانګړو ټرافیکي پلانونو د جوړولو هم لارښوونه وکړه.

محمد سهیل اپریدي زیاته کړه چې روان مالي کال به د امن، پرمختګ او سوکالۍ کال وي او د امن او امان د لا ښه کېدو لپاره د پولیسو بودیجه هم زیاته شوې ده.

غونډې ته په ورکړل شوي بریفنګ کې وویل شول چې په هزاره ډویژن کې د کلني پرمختیایي پروګرام تر چتر لاندې پر ۱۳۹ پرمختیایي پروژو کار روان دی. همدارنګه د پاکستان سیټیزن پورټل له لارې ثبت شوي ۲,۱۱۱ شکایتونو څخه ۱,۸۷۹ هوار شوي دي او د حکومت د اوپن ډور پالیسۍ له مخې له ۱۰۰ څخه زیاتې پرانیستې کچې ترسره شوې دي.

بریفنګ زیاتوي چې په ایبټ اباد او بټګرام کې د ځمکو ریکارډ سل سلنه، په هریپور کې ۹۷ سلنه او په مانسهره کې ۹۰ سلنه ډیجیټل شوی دی. همدارنګه په هزاره ډویژن کې ۲۰ د پولیسو د اسانتیاوو مرکزونه فعال دي او ۶ نور تر جوړېدو لاندې دي.