د خیبر ضلعې د لنډي کوتل د نيو کرسچن کالونۍ اوسېدونکو غوښتنه کړې ده، چې د مسيحي ټولنې لپاره لګېدلی ټيوب‌ ويل دې يا د دوي په واک کې ورکړل شي او يا دې د حکومت تر انتظام لاندې راوستل شي، څو د کالونۍ اوسېدونکو ته د څښاک د اوبو منظمې اسانتياوې برابرې شي.

د خیبر ضلعې پرېس کلب کې ،د جولایۍ په لومړۍ، یوې خبري غونډې ته د وينا پر مهال فاسټر الياس جارج، داود عمران، اسرار مسيح او نورو وويل، چې هغه ټيوب‌ ويل چې د مسيحي ټولنې لپاره لګېدلی، د دوي په وينا، له نږدې يو نيم کال راهيسي د ځمکې د مالک په واک کې دی. دوي ادعا وکړه چې د دغه ټيوب‌ ويل اوبه د شخصي ټېنکرو له لارې خرڅېږي، خو د نيو کرسچن کالونۍ اوسېدونکي د څښاک اوبو لپاره په لوړه بيه له شخصي ټېنکرو اوبه اخلي.

ويناوالو وويل، چې د دې ستونزې په اړه يې څو ځله د لنډي کوتل اسسټنټ کمشنر، د خیبر ډپټي کمشنر، د لنډي کوتل تاڼې ايس اېچ او، د خیبر ډسټرکټ پوليس افسر او د پبلک هېلت انجنيرۍ څانګې چارواکو ته درخواستونه ورکړي، خو د دوي په خبره، تر اوسه د ستونزې د هواري لپاره عملي ګامونه نه دي پورته شوي.

د دوي په وينا، د اقليتونو د پخواني صوبايي اسمبلۍ غړي وېلسن وزير د دورې پر مهال د نيو کرسچن کالونۍ لپاره د صوبيدار ملک طارق په ځمکه د پبلک هېلت انجنيرۍ څانګې له لارې ټيوب ‌ويل لګول شوی و. دوي وويل، چې د شوې هوکړې له مخې به هره ورځ درې تر څلورو ساعتونو پورې کالونۍ ته اوبه ورکول کېدې.

ويناوالو ادعا وکړه چې د ټيوب‌ ويل د سولر نظام له بشپړېدو وروسته څو مياشتې اوبه برابرېدې، خو وروسته د بېلابېلو لاملونو په يادولو سره د اوبو رسونه ودرول شوه او اوس ټيوب‌ ويل په بشپړه توګه نيول شوی دی.

دوي دا ادعا هم وکړه چې د ټيوب‌ ويل اوبه د کرنيزو موخو لپاره کارول کېږي او کالونۍ ته تلونکی د اوبو پايپ لاين څو ځله زيانمن شوی دی. د دوي په خبره، د نورو ادارو پايپ لاينونه خوندي دي، خو يوازې د نيو کرسچن کالونۍ پايپ لاين ته زيان رسول کېږي.

د خبري غونډې ګډونوالو غوښتنه وکړه چې تر هغو چې د پبلک هېلت انجنيرۍ څانګه د ټيوب‌ ويل لپاره دايمي چلوونکی نه وي ګومارلی، د خیبر ډپټي کمشنر دې د تيګه فنډ له لارې لنډمهالی چلوونکی وټاکي، څو د کالونۍ اوسېدونکو ته د څښاک اوبو رسونه بېرته پېل شي.

دوي له د خیبر پښتونخوا اعلا وزير، چيف سېکرټر، د خیبر ډپټي کمشنر او نورو اړوندو چارواکو وغوښتل چې د نيو کرسچن کالونۍ د څښاک اوبو د اوږدمهالې ستونزې سمدستی نوټس واخلي او د هغې د دايمي حل لپاره عملي اقدامات وکړي.

تر اوسه د يادو ادعاوو په اړه د ځمکې د مالک يا اړوندو حکومتي ادارو رسمي دريځ نه دی ترلاسه شوی.